د امنیتي او دفاعي ځواکونو پرون او نن

پنځه کاله وړاندې زموږ امنیتي او دفاعي ځواکونه په ګڼو ستونزو کې وو، له یوې خوا د دوی حقوق او امتیازات د مفسدو چارواکو له لوري حیف او میل کېدل، له بل لوري ولسمشر کرزي طالبان وروڼه بلل او دې کار د امنیتي او دفاعي ځواکونو په روحیه بد اغېز کاوه. دوی ته هغسې پاملرنه کېده چې څنګه ښاېدله. له دې امله یې هم ګڼې ستونزې لرلې او هم یې د تلفاتو کچه لوړه وه، ولس هم چندان زیات باور نه ورباندې کاوه، مګر له کومې ورځې چې ولسمشر غني واک ته رسېدلی دی، نو د نوموړي د ځانګړې پاملرنې له برکته د هیواد امنیتي او دفاعي ځواکونو پام وړ پرمختګ کړی دی.

د دوی مسلکي وړتیاوې روزل شوي، د دوی له لیکو فساد ورک شوی، د دوی حقونه او امتیازات څوک نشي تلف کولی، طالب ته اوس د رهبرۍ له لوري د ورور نه، بلکې د دښمن خطاب کېږي. د دوی اعاشه، اباطه، درملنه، معاش او امتیاز کې پام وړ بدلون راغلی دی او تر ټولو مهمه دا چې د امنیتي او دفاعي سکتور رهبري بدله شوې، ضوابط پر روابطو حاکم شوي ، شفافیت راغلی او دې هر څه هم د امنیتي او دفاعي ځواکونو روحیه پیاوړې کړې او دا مهال دښمن د دوی پر وړاندې ځان کمزوری حس کوي او له بل لوري د ولس باور تر بل هر وخت ورباندې زیات شوی او له همدې امله یې ولسونه پراخ ملاتړ کوي.

کلونه وړاندې مونږه ټول شاهدان یو چې همدغو امنتي ځواکونو کومې ستونزې درلودې خو هيچا یې غم نه خوړله. د دښمن پر وړاندې به ورته د جنګ کولو غلط پلان جوړ شو او د همدغه غلط پلان په نتیجه کې به دوی له ماتې سره مخامخ شول. او بل د دوی لویه ستونزه دا وه چې له دوی سره جنګي وسایل نه ول لکه څنګه به چې له دوښمن سره ول.

خو په دې تېرو پنځه کلونو کې ولسمشر محمد اشرف غني چې کوم کارونه وکړل بل ولسمشر به یې ورته په پنځوسو کلونو کې هم ونکړي. ښاغلي غني له خپلو امنیتي ځواکونو سره په خپله مخامخ خبرې وکړې او هغه ستونزې چې دوی درلودې هغه یې په ښه غور سره له دوی څخه په خپله خوله  واورېدې او د دوی د ټولو ستونزو په تړاو یې اړوند مسوليونو ته دا وظيفه وسپارله چې ژر تر ژره د دوی د ستونزو غمه وخوري او هر څه ته چې اړتیا لري هغه ټولې باید ورته تر سره شي. ځکه چې همدغه زړور امنتي او دفاعي ځواکونه دي چې نن مو په هر کور کې هر یو نفر په ارامه سره ويده کېږي او سبا په ارامه غوږو او سړو مغزو سره خپلې وظیفې ته ځي. او که چېرته دوی نه وای نو نن به مونږ هم نه وو.

د ښاغلي غني ملاتړ له امنیتي ځواکونو څخه د هغوی په وجود کې وينه نوره هم په جوش سره راوستله او په خپلو دندو باندې یې ویاړ کوي. او تر پخوا اوس ورته ډېر ځوانان هم دې دندې ته زړه ښه کوي غواړي چې یوه مړۍ حلاله روزي خپلې کورنۍ ته وګټي او هم دخپل وطن حق ادا کړي او له وطن څخه ساتنه وکړي.