امنیتي او دفاعي ځواکونه د خلکو ساتونکي

مطیع الله سحر-

د افغانستان امنتي او دفاعي ځواکونه تل له خپل ولس څخه په مېړانې سره دفاع کوي. دوی تل په دې هڅه کې وي چې څنګه د ولس او د هیواد په خاطر د دښمن پر وړاندې  مقاومت وکړو تر څو مو نه هیواد ته او نه هم ولس ته ذره تاوان ورسېږي. دوی په خپل زیار او کوښښ سره همېش د دښمن په مقابل کې مقاومت کړی. دښمن یې مات کړی، دښمن یې مخ توری کړی، دښمن ته یې د دې اجازه نده ورکړې چې هغه مخ پر وړاندې لاړ شي او مونږه مات کړي د سر په قېمت ورسره جګړه کوي او ماتوي یې.

تېره ورځ مونږه او تاسو په خپلو سترګو وليدل چې همدغو امنیتي او دفاعي ځواکونو د هغو سرزورو مخه ونيوله چې غوښتل یې د شهید اونۍ د لمانځلو په پلمه په کابل او یو شمېر نورو ولایتونو کې ګډوډي رامنځته کړي. خو دوی په خپل پلان کې بریالي نشول. دوی د شهید اونۍ په دا ډول لمانځله چې په دې ورځ باید د هیواد شهیدانو ته ټول ولس دعا وکړي، خو د دوی دې بې نظمي چې ولس ته یې سر خوږی جوړ کړی ،  له خلکو یې شهیدان هم هېر کړل چې دوعا ورته کړي.

دوی د کابل په لويو څلور لارو کې له وسلو سره راوتي ول، خپلې موټرې یې د احمد شاه مسعود په عکسونو باندې پوښلې وې او هر ډول وسلو باندې یې ځانونه سمبال کړي وو او هوايي ډزې یې کولې چې په اکثره کورونو کې یې عام ولس په عذاب کړي و. ځينې د دوی په هوايي ډزو کې زخمیان شول. د دوی له ډلې څخه یو یې  د هیواد زړور امنیتي ساتونکي باندې ډزې وکړې چې هغه زړور عسکر یې را شهید کړ.

خو زمونږه امنیتي او دفاعي ځواکونو بیا د دوی پر وړاندې ونه وېرېدل. او پرته له کومې وېرې د هغوی مخه ونیوله. او زیات هغه کسان یې هم د قانون منګولو ته وسپارل کومو سره چې په لاس کې وسلې وې او د ښار نظم یې خرابولو. هغوی یې ونیول او باور دی چې له دوی څخه به څېړنې کېږي او د دغو خپلسریو سزا به ویني، ځکه چې امنیتي او دفاعي ځواکونه هیچاته د دې اجازه نه ورکوي چې د ښار او ښاریانو نظم او ارامي ته صدمه ورسوي او دغسې خودسرانه او غیرقانوني کړنې ترسره کړي چې د نورو د نارامۍ او مزاحمت لامل وګرځي.