د افغانیو مقابل کې د پاکستانۍ کلدارو بې ارزښته کېدو پاکستانیان غوسه کړي

د پاکستان د مسلم لیګ ن ګوند مشرانو خواجه آصف او احسن اقبال د پاکستان پر اوسني حکومت انتقاد کړی چې د دوی د ناکاره اقتصادي پالیسیو او له ګاونډیو سره د ناسمو اقتصادي اړیکو له وجې کلداره د افغانیو پر وړاندې په بېساري ډول رالوېدلې ده….

د مسلم لیګ ـ ن ګوند یو جګپوړي غړي احسن اقبال پر عمران خان تور لګولی چې په اقتصاد هېڅ نه پوهېږي: “د نیپال معیشت له موږ نه مخکې دی، حتی دا چې اوس د افغانستان کرنسي هم له موږ نه مخکې (له روپۍ نه ګرانه) ده.”

دا وخت یوه پاکستانۍ روپۍ، د نیمې افغانۍ نه هم کم ارزښت لري او په کابل کې ۱۰۰۰ پاکستانۍ روپۍ په شاوخوا ۴۶۰ افغانیو اړول کیږي.

که څه هم له تېرو لسو کلونو افغانۍ او روپۍ هېڅکله سره برابر شوي نه دي او افغانۍ لوړه پاتې شوې ده، خو د یادولو وړ ده چې په دې وروستیو درېیو کلونو کې د افغانۍ په مقابله کې د پاکستانۍ روپیو قدر نور هم زیات کم شوی دی.

دا چې افغانستان په دې موده کې څنګه وکړای شول چې خپله د کرنسۍ بیه جګه وساتي، د اقتصادپوهانو په وینا یوه وجهه یې کیدای شي دا وي چې افغانستان د پاکستان غوندې غټې نړېوالې قرضې نه لري او بل دا چې ورسره زیاتې بهرنۍ مرستې هم کیږي.

هاخوا بیا پاکستانۍ روپۍ د تېر حکومت په پرتله په اوسني حکومت کې پرله پسې مخ په کښته لوېږي چې اوس یې ارزښت تر بل هر وخت کم شوی او تېره هفته د یوه امریکایي ډالر په بدل کې د یوې روپۍ بیه ۱۶۸٫۹۱ ته راولوېده.

د ډیوه راډیو د راپور پر اساس، د اقتصادي کارپوهانو په وینا، د روپۍ د ارزښت کمېدو یو سبب د پاکستان پر مرکزي حکومت د بهرنیو قرضو د اداء کولو فشار او له ګاونډیو سره ناسمې اقتصادي اړیکې دي.