موقت حکومت یعني یو بې خیره نظر

هغه روشنفکران (!) چې د موقت حکومت ډنډورې وهي، هغوی لکه چې له تاریخ څخه نه دي خبر او یا لا هم په تېرو کلونو کې اوسېږي. نوره نړۍ مخته ځي او زموږ دغه په اصطلاح روشنفکران شا ته زور کوي. سړی حیران شي چې روان وضعیت او دغو ظلمونو ته د پای ټکی یو غښتلی نظام ايښودلی شي او که یو کمزوری موقت حکومت؟ خلک چې هره ورځ په ځانمرګو بریدونو کې شهیدانېږي او یا هم نورو چاودنو او بریدونو کې نو مسؤلیت یې د چا دی؟ د جنګ دواړه لوري باید خپل تاریخي مسؤلیت درک کړي او پر خپلو خلکو رحم وکړي. ښه به وي چې اوربند وشي او د نظام د قوي کولو لپاره ټول سره سلا شي او عزتمنه سوله وکړي.

نظام دا نه چې احمد یا محمود یې په سر کې دی. نظام باید په غلطي سره د ځینو اشخاصو شخصي ملکیت و نه ګڼل شي. نظام د ډېرو کوښښونو، سرښندنو او امکاناتو په لګولو سره منځته راغلی او ټول خلک باید په زغرده د خپل نظام د بقا او پايښت لپاره کار وکړي. په شته نظام کې ځينې اشخاص په موقت ډول پر ځینو پوستونو باندې ټاکل کېدای شي، خو نه دا چې ټول حکومت په لوی لاس موقت کړل شي.

د نظام په غښتلي کولو کې زموږ د ټولو عزت خوندي کېدای شي او هم مو له هرې بدبختۍ څخه ساتلی شي. نور ملتونه خپل نظامونه قوي کوي او د خپل هېواد د لوړو ګټو لپاره له خپلو شخصي هغو څخه تېرېږي، خو زموږ روشنفکران (!) بیا له بده مرغه د خپل نظام تضعیفولو ته بډوهلي ناست دي. همدا فکري طرز زموږ او د نورو ملتونو تر منځ لوی توپیر جوړوي. هغوی ورځ تر بلې پرمختګ کوي او زموږ بیا د یو بل وینو ته تږي ناست دي.

ډېر به لېرې نه ځو. که په خپل ګاونډ کې سترګې وغړوو نو و به ګورو چې دا څه باندې اویا کاله کېږي، چې لا تر اوسه یې د انګریز په لاس د جوړ نظام اډانې ته د دې لپاره لاس نه دی ور وړی چې ګواکې سياسي ثبات او اقتصادي ثبات ور سره کاواکه کېږي، خو دلته بیا زموږ ځینې بې خبره سیاسیون (!) هره ورځ د موقت حکومتونو او د ډول ډول نظامونو سندرې بدرګه کوي.

که یو قوم په خپله د ځان د بدلون هوډ و نه کړي، نو خدای ج یې هم حالت نه بدلوي. همدې اصل ته په کتو، پکار ده چې د تخریب او ځان غوښتنې فکر له سره وباسو او د پرمختګ او تعالي په لور ګام اوچت کړو. دا سمه ده چې نوره نړۍ به موږ ته مالي امکانات برابر کړي او خپلو مرستو ته به دوام ورکړي، خو د انسانیت په چوکاټ کې ژوند کول او د یو بل درناوی او عزت زموږ خپل کار دی. که موږ په خپل ځان او خپلو خلکو رحم و نه کړو نو له نورې نړۍ څه تمه کولی شو؟