ښځه یم کمزورې نه یم
زه نغمه یمه د میني زه زینت د دې جهان یم
زه همزولې د ښکلا یم زه له میني د سبحان یم
چي زه نه یم رنګ به نه وي چي زه نه یم هنر نسته
چي زه نه یم هستي ختمه چي زه نه یم بشر نسته
زه خالق د هری میني ملکه د هر داستان یم
زه همزولې د ښکلا یم زه له میني د سبحان یم
هغه زه یم چي په غېږ کي افلاطون مي دی روزلی
هغه زه یم چي په ټال کي پیغمبر مي زنګولی
پر نړۍ چي هر لوی نوم دی هغه ما دی زېږولی
معجزه د اسمانونو له یزدانه تر انسان یم
زه همزولې د ښکلا یم زه له میني د سبحان یم
هغه زه یم چي په مینه مي فرهاد سوري کول غرونه
کرشمه ده زما د حسن چي جوړیږي محلونه
زما د حُسن له بغداده رنګین سوي دي نکلونه
زما په یاد دي څرخېدلي بې حسابه قلمونه
هغه زه یم چي بلېږم له پتنګ سره پیمان یم
زه همزولې د ښکلا یم زه له میني د سبحان یم
پنجرې دي د فولادو زما وزر ته نه ټینګیږي
د یاجوجو د ماجوجو دېوالونه به نړیږي
د تیارو د شیطان غرونه یو په بل پسي ړنګیږي
شپه که هر څومره اوږده سي عاقبت به سبا کیږي
دې ویاله کي اوبه تللي سبا بیا پکښی بهیږي
زه خالق یم را لېږلې زه مي زېری د یزدان یم
زه همزولې د ښکلا یم زه له میني د سبحان یم
زه د خپل وجود په وینو دلته شمعي بلومه
زه پخپلو وزرونو د تیارې پلو څیرمه
زه پانوس غوندي بلېږم دا تیارې رڼا کومه
معجزه د خپل خالق یم منترونه ماتومه
زه د جهل ځنځیرونه د زمان کندي ته وړمه
په خپل زور په خپل تدبیر مي خپل تقدیر ځانته لیکمه
زه جلوه د کردګار یم زه قاتله د شیطان یم
زه همزولې د ښکلا یم زه له میني د سبحان یم
بیا به زه بیا به ګودر وي بیا دښتونه مستومه
د ادم د رباب سور ته پایزېبونه شرنګومه
د کیږدۍ تر ماښامونو د ګودر ترانې وړمه
له لنډیو کفنونه محتسب لره ګنډمه
په قدم د سپېلني به د رڼا پر لوري ځمه
د جاهل په هدیره کي د مکتب خښته ایږدمه
له خالقه رڼا اخلم ورځي شپو ته ورکومه
د سیالانو په ټولۍ کي قافلې روانومه
ګړندي مي دي ګامونه زه سرلارې د کاروان یم
زه همزولې د ښکلایم زه له میني د سبحان یم
د ۲۰۲۲ کال د اپرېل یوولسمه، ویرجینیا
د دعوت رسنیز مرکز ملاتړ وکړئ
له موږ سره د مرستې همدا وخت دی. هره مرسته، که لږه وي یا ډیره، زموږ رسنیز کارونه او هڅې پیاوړی کوي، زموږ راتلونکی ساتي او زموږ د لا ښه خدمت زمینه برابروي. د دعوت رسنیز مرکز سره د لږ تر لږه $/10 ډالر یا په ډیرې مرستې کولو ملاتړ وکړئ. دا ستاسو یوازې یوه دقیقه وخت نیسي. او هم کولی شئ هره میاشت له موږ سره منظمه مرسته وکړئ. مننه
د دعوت بانکي پتهDNB Bank AC # 0530 2294668 :
له ناروې بهر د نړیوالو تادیاتو حساب: NO15 0530 2294 668
د ویپس شمېره Vipps: #557320 :
Support Dawat Media Center
If there were ever a time to join us, it is now. Every contribution, however big or small, powers our journalism and sustains our future. Support the Dawat Media Center from as little as $/€10 – it only takes a minute. If you can, please consider supporting us with a regular amount each month. Thank you
DNB Bank AC # 0530 2294668
Account for international payments: NO15 0530 2294 668
Vipps: #557320
Comments are closed.