دا تیارې به رڼا کیږي

دغه بڼ به زرغونیږي ما په خوب کي دی لیدلی
دا سل ځله رژېدلی خزانونو آزمېیلی

په ویاله کي چي اوبه وي یو ځل تللي بیا بهیږي
له دې شاړو وچو مځکو بیا غاټول را زرغونیږي
شپې که هر څومره اوږدې وي عاقبت به لمر ځلیږي
بیا به سېل د شوپرکو له رڼا وي تورېدلی
دغه بڼ به زرغونیږي ما په خوب کي دی لیدلی

د پردي ملا په خوله به خلک نه سي غولېدلای
په اذان به یې وګړي روژه نه سي ماتولای
په ماشومو یتیمانو به واسکټ نه سي منلای
د حلوا به وي محتاجه د خیرات کاسو روزلی
دغه بڼ به زرغونیږي ما په خوب کي دی لیدلی

یوه ورځ به داسي راسي چي به پیل سي مکتبونه
مدرسې به وي تړلي ورلوېدلي وي قلفونه
نه ټګي د مولویانو نه بدمرغه واسکټونه
نه به چاته له پنجابه وي د جنګ امر راغلی
دغه بڼ به زرغونیږي ما په خوب کي دی لیدلی

یوه ورځ به داسي راسي مدرسه به پوهنتون وي
د ډېوې دښمن به ړوند وي د کتاب غلیم زبون وي
نه به ږغ د محتسب وي نه دُره نه به جنون وي
په خپل حکم به سنګسار وي خپل بادار ته شرمېدلی
دغه بڼ به زرغونیږي ما په خوب کي دی لیدلی

ماته تیري کیسې وايي دا خوبونه ریشتیا کیږي
د ظالم عمر به لنډ وي په خپل تېغ به حلالیږي
د پردیو خلوتونو په تیارو کي به ښخیږي
ما یې قبر دی لیدلی چي په کاڼو وي ویشتلی
دغه بڼ به زرغونیږي ما په خوب کي دی لیدلی

یوه ورځ به داسي راسي چي شرنګیږي ربابونه
د زلمیو توري څڼي به تاوده کړي محفلونه
بیا به اورو له مطربه جهاني ستا غزلونه
ما یې فال دی پر اورغوي له ازل سره کتلی
دغه بڼ به زرغونیږي ما په خوب کي دی لیدلی.

د ۲۰۲۲ کال د ډسمبر د میاشتي دوه ویشتمه، ویرجینیا