اختریزې لنډۍ – ۴مه برخه

 

همدا اوس لوړ چنار ته خیژم

میاشت به څارم اختر به نن که سبا وینه

 

د اختر په مناسبت د راټولو کړو لنډیو په دې برخه کې بیا هم په اختر پورې اړوند څو نوې لنډۍ:

 

لستوڼي بډوهئ گډېـږي

د غريبانو اختر کله ـ کله وينه

 

اختر خو راغی، خوښي نه شته

خلک اوښلنې سترگې ښکته پورته ځینه

 

خلک اختر ته خوشحالېـږي

زموږه کلي کې ژړا واویلا وینه

 

اختر دې نه راځي دې خوا ته

زموږ مالت کې ورنه نه شته دي ځایونه

 

راغی اختر خو خوښي نه شته

زموږه ټول عمر رنځونه دي ویرونه

 

جوړوای نه شم ځان اختر ته

له هرې خوا نه راروان ستونزې ویرونه

 

زه به مې څنگه زړه خوشحال کړم

چې د اختر په نامه هېڅ شی نه لرمه

 

اختر ته هېڅ نه خوشالېږم

چې خوښي نه شته لوږه ویر دی ماتمونه

 

ورځ د اختر ده څوک رانغلل

د غریبانو کره کله څوک ورځینه

 

اختر کې بیا د ژړا غږ شو

انتحاریانو بیا قتلونه کړي دینه

 

څوک به یې ورسوي خدای ته

چې په اختر کې مو ارام ته نه پرېږدینه

 

خلک دي وږي خوښي نه شته

خدای دې په داسې اختر اور ولگوینه

 

اختر به څه کړو داسې حال کې

یا خلک وږي یا ناروغ لري رنځونه

 

شکایت چا ته وکړو خدایه

بله لار نه شته ژر به ځان زندۍ کوونه

 

اختر سرزوری راروان دی

ورته حیران دي ویر لړلي مالتونه

 

یارانو دا څنگه اختر دی

چې بې حسابه دي ویرونه او قبرونه

 

د اختر تگ راتگ نه غواړم

څو چې ویرونه وي اختر خوند نه کوینه

 

مرگ او ویرونه مو میلمه دي

بل وخت خو پرېږده، په اختر کې هم ویرونه

 

اختر په خوښو زړونو کېـږي

موږه غمجن یو، موږ کې نه شته اخترونه

 

همدا اوس لوړ چنار ته خیژم

میاشت به څارم اختر به نن که سبا وینه