محب: صالح ولسمشر غني ته د جنګي وضعیت په اړه ‘له حقیقت لېرې’ مالومات ورکول

نوموړي بي بي سي سره ځانګړې مرکه کې ویلي، دا اختلافات د هغو مشورو او مالوماتو په برخه کې وو چې دې دواړو ادارو مخکیني ولسمشر محمد اشرف غني ته ورکولې.

ښاغلي محب ویلي، د ښاغلي غني لومړي مرستیال امرالله صالح ولسمشر ته داسې مالومات او مشورې ورکولې چې له حقیقت لېرې وې.

د دې پوښتنې په ځواب کې چې د خپلې وروستۍ دندې په ورځو کې یې تر ټولو لویه تېروتنه څه وه، ښاغلي محب وویل:

“کله چې جنګي حالت رامنځته شو د ادارو ترمنځ ټکر راغلی و. معاون صاحب اول هم ډېره علاقمندي درلوده په امنیتي سکتور کې. مشورې به یې رئیس صاحب جمهور ته ورکولې. موږ هم دا کار کاوه. هغه مالومات چې موږ ورکول او معاون صاحب اول ورکول، ډېر تفاوت و پکې. ډېر مالومات داسې وو چې له حقیقت سره یې سر نه خوړلو”.

ښاغلی محب وایي چې ده په دې برخه کې یو څه کولی شوای، د بېلګې په توګه دا چې پر مقابل لوري (ولسمشر لومړي مرستیال) ډېر فشار راوړي، او یا دا چې له خپلې دندې استعفا وکړي.

پخپله امرالله صالح تر دې دمه د حمدالله محب دې څرګندونو ته کوم غبرګون نه دی ښودلی، خو په تېر کې یې پر مخکیني ولسمشر غني نیوکه کړې چې هېواد یې پرېښود.

په تېر اګست کې د پخواني جمهوري نظام له سقوط وروسته ګڼو مخکینیو چارواکو یو بل ته د پړې ګوته نیولې ده.

د ملي مصالحې عالي شورا مخکیني مشر عبدالله عبدالله د کابل د سقوط پر ورځ په یوه لنډ ویډیو کلپ کې ولسمشر غني ملامت کړی و چې د ده په ټکو، ولس یې په بد وضعیت کې پرېښود.

یو شمېر پخوانیو چارواکو بیا پخپله حمدالله محب ملامت کړی او تور لګوي چې د ملي امنیت سلاکار د نورو وزارتونو او دولتي ادارو په دندو کې لاسوهنه کوله.

خو ښاغلي محب له بي بي سي سره مرکه کې دا تورونه رد کړل او ټینګار یې وکړ چې د جمهوري نظام پر مهال هر وزارت او ادارې خپل واکونه او مسؤلیتونه درلودل.

کابل ته د طالبانو له ننوتلو وروسته د پخواني نظام ګڼ چارواکي له هېواده ووتل او دا مهال د نړۍ بېلابېلو برخو کې مېشت دي.

پخپله ولسمشر محمد اشرف غني متحده عربي اماراتو ته ولاړ او تر دې دمه د هغه هېواد د حکومت د مېلمه په توګه هلته مېشت دی.

د نوموړي د لومړي مرستیال امرالله صالح کره ځای ځایګی نه دی مالوم، خو داسې ګومان کېږي چې په تاجکستان کې دی.

بی بی سی پښتو