افغان سوداګرو، چین او ایران هیوادونو له زلزله ځپلو سره د مرستې ډاډ ورکړ

افغان سوداګر وايي دوی به د خوست او پکتیکا له زلزله ځپلو سره مرستې کوي. یو شمېر سوداګرو چې څو ورځې وړاندې یې د ا.ا.ا له لوی مشر سره کتلي وو، تازه یې د بهرنیو چارو له سرپرست وزیر امیرخان متقي سره کتلي دي. په دې لیدنه کې پر سوداګریزو مسایلو خبرې شوې دي او همدا راز له بهرنیو چارو وزارت غوښتل شوي چې د سوداګرو په چارو کې آسانتیا رامنځ ته کړي. بلخوا امیرخان متقي پر افغان سوداګرو غږ کړی چې د وروستیو زلزلو له زیانمنو شوو کورنیو سره مرستې وکړي او د دوی لاسنیوی وکړي. افغان سوداګرو ژمنه کړې چې دوی به تر خپلې وسې پورې د خپلو هېوادوالو لاسنیوی کوي او بشردوستانه مرستو ته تیار دي.

چین له زلزله ځپلو سره د مرستې ژمنه کړې ده. د چین د بهرنیو چارو وزارت له لوري په خپره شوې اعلامیه کې راغلي چې دوی په پکتیکا او خوست ولایتونو کې د وروستۍ زلزلې له امله د خپلې همدردۍ مراتب له افغان ولس سره شریکوي.

د چین د بهرنیو چارو وزارت وایي چې د تېرې شپې پر زلزلې او دغه راز له امله یې پر اوښتو تلفاتو خواشیني دي. چین ژمنه کړې چې له افغانستان سره مرستو ته تیار دي او په خبره یې ژر به زلزله ځپلو ته بېړنۍ بشري مرستې ورسوي.

ایران د وروستۍ زلزلې له زیانمنو شوو سره د مرستې لپاره تیاری ښوودلی دی. د ایران د بهرنیو چارو وزارت ویاند سعید خطیب زاده په تازه څرګندونو کې ویلي د افغانستان په ځينو سیمو کې سخته زلزله شوې چې له امله یې خلکو ته مالي او ځاني تلفات اوښتي دي.

نوموړی وایي ایران پر دغه پېښه خپله ژوره خواشیني څرګندوي او په دې خفګان کې ځان له افغانانو سره شریک بولي. ایران وایي دوی له افغانانو سره بشردوستانه مرستو ته تیار دي او هڅه کوي په دې سختو شرایطو کې همکاري ولري.

بلخوا د ایران د سرې میاشتې مشرتابه هم ویلي چې دوی له افغانانو سره مرستو ته تیار دي او که افغان لوری ترې وغواړي دوی هڅه کوي چې د پېښې سیمې ته خپل مرستندویه ټیمونه ولېږي او بېړنۍ مرستې ورسوي.