د ماشومانو بې لارې کېدل

ماشومان ولې بې لارې کیږي؟ علتونه او لاملونه څه دي؟ د دې ستونزې د حل لپاره باید څه وشي؟

ــــــــــــــــــــــــــ

ماشوم هغه چاته ویل کیږي چې ۱۸ کلنۍ عمر یې نه وي پوره کړی، یا ماشوم هغه چاته ویل کیږي چې د بلوغ تر مرحلې نه وي رسېدلی، او یا په بل عبارت ماشوم هغه چاته ویل کیږي چې د ښو او بدو ترمنځ توپیر نشي کولای.

په افغاني ټولنه کې د ماشوم بې لارېتوب یوه عامه او جدي ستونزه ده، بدبختانه د ماشومانو د سالمې ښوونې او روزنې لپاره والدینو، مشرانو، ښوونکو او دولت خاصه او اساسي توجه نده کړې؛ د انسان صحیح روزلو نتیجه مونږ او تاسې ټول وینو چې تر سپوږمۍ، فضاء او مریخ پورې یې پرمختګ کړی دی.

که چیرته د انسان (ماشوم) سالمه تربیه ونشي له وحشي حــیــوان څخه هم بدتر او خطرناک جوړېدای شي.

د دې ستونزې اساسي علتونه او لاملونه څه دي؟

۱- د والدینو او کورنۍ د پوهې د کچې ټیټوالی.

۲- د ناسالمې او خرابې ټولنې شتون.

۳- د اولادونو فعالیتونه او اړیکې نه څارل.

۴- د هغوی اړتیاوو او علاقو نه پېژندل او نه پوره کول.

۵- د تقدیر او تهدید نشتون.

۶- ډېره آزادي.

۷- شرطي کول، مثلا: بغیر له ضرورت او مشکل څخه ورته پیسې ورکول(که وژاړي، وړاندې له دې چې علت او سبب معلوم کړای شي پیسې یا نور … ورکول)، چې دا د ماشوم آینده له خطر سره مخ کوي.

۸- ماشومانو سره مناسبې خبرې او لوبې نه کول.

۹- د اولادونو، ماشومانو او زده کوونکو ترمنځ عدالت نه کول.

۱۰- د نیمګړتیا/عیب له وجې په نامناسبو نومونو سره یادول.