ماکسیم ګورکي دا وایي

د روسیې د ۱۰۵ کاله پخواني انقلابي لیکوال (ماکسیم ګورګي) خبرې په نړۍ کې درې ډوله غلۀ شتون لري.

۱ – معمولي غلۀ

۲ – سیاسي غلۀ

۳ – مذهبي غلۀ

معمولي غلۀ هغه کسان دي چې پیسې، بټوې، ساعتونه، سرۀ او سپین زر، د کور سامان او ستاسو داسې نور شیان د خپلې او د خپلو د ماشومانو د خېټو د مړولو لپاره غلا کوي.

سیاسي غلۀ هغه کسان دي چې ستاسو راتلونکې، ارمانونه، ارزوګانې، د راتلونکي ژوند لپاره خوبونه، کار، ژوند، حق، ګټه، تنخوا، زده کړې، توان، اعتبار، عزت، ملي پانګې او ان ستاسو مالیې چور او تالان کوي او هم تاسو په تیارو او بد بختیو کې ساتي.

مذهبي غلۀ هغه کسان دي چې ستاسو دا ښکلې نړۍ، ستاسو د فکر کولو جرائت، عقل او پوهه، جشن او خوشحالي، د بدن او د روح روغتیا او همداشان ستاسو مال او شتمني غلا کوي. هغوی په تاسو باندې خدای، دین، جنت، خرافات، ناپوهي، غم، خپګان، غمرازي، مایوسي او داسې نور په ګرانه بیه خرڅوي. مذهبي غلۀ په خپلو غولوونکو خبرو تاسو ته د جنت باغونه درښیي، درواغ درته وایي، غولوي مو، ځان درباندې باروي او تاسو په ذلت، خوارۍ، بدبختۍ او نورو ناخوالو کې ساتي.

د دوی تر مینځ په زړۀ پورې توپیر دا دی چې معمولي غلۀ تاسو د ځان لپاره ټاکي خو تاسو بیا سیاسي او مذهبي غلۀ پخپله د ځان لپاره ټاکئ او هغوی ته ارزښت ورکوئ او لویان یې شمېرئ.

بل لوی توپیر یې دا دی چې معمولي غلۀ د پولیسو لۀ خوا تعقیبېږي، نیول کېږي، شکنجه او ربړول کېږي، په متروکو وهل کېږي، زندان ته اچول کېږي، پښې او لاسونه یې تړل کېږي، بېعزتي یې کېږي خو سیاسي او مذهبي غلۀ دواړه د قانون او پولیسو له خوا خوندي کېږي، لوړ مقام او څوکۍ ورکول کېږي، هغوی زور کاروي او ان له تاسو نورې غوښتنې هم کوي.

دا په ۱۹۱۶ کال، په ماسکو کې د روسي لیکوالانو د ټولنې په غونډه کې د روسي نامتو لیکوال ماکسیم ګورګي خبرې وې.

له بده مرغه دا هغه څه دي چې همدا اوس په افغانستان کې په روښانه توګه لیدل کېږي او تر ټولو بده خو لا داده چې د افغانستان ملایان سیاسي هم دي چې په یوۀ غشي دوې کوترې ولي.