ایا تاسو له ځان سره خبرې کوئ؟

هغه کسان چې وخت ناوخت له ځان سره پر لوړ غږ خبرې کوي په ذهني توګه فعال او تازه وي.

د امریکا د یو طبي پوهنتون د تازه څیړنې له مخې هغه خلک چې له ځان سره د خبرو کولو عادت لري، هغوی په ذهني توګه تازه او پر مسایلو متمرکز کسان وي.

ددې پوهنتون څېړونکې ډلې یو شمېر هغو کسانو ته پام کړی چې له ځان سره د خبرو کولو روږدي وي او معلومه کړې يې ده چې دا چاره کومه ناروغي نه؛ بلکې د ذهني چارو د لا ښه والي له پاره مرسته کونکې ده.

څېړنې ښودلې ده چې له ځان سره خبرې کول؛ ذهني او ذاتي چارې لا ښې کوي او انسان په ذهني ډول پر هغه څه چې غواړي يې تمرکز کوي.

په څېړنه کې زیاته شوې ده په لوړ غږ له ځان سره خبرې کول د ذهن یا مغزو هغه برخه په کار راولي چې د فکر کولو او یادښت ساتلو صلاحیت لري.

څېړونکي باور لري چې له خپل ځان سره خبرې کول، ذهن او تصورات پر هغه ټکي یا موضوع باندې چې تاسو يې غواړئ، متمرکز کوي، په تصوراتو کې روڼوالی راځي چې له امله يې تاسو ته ستاسو غوښتونکې کلمې په لاس درځي.

څېړنه کاږي، له ځان سره د خبرو کولو عادت تل مرسته کونکی ثابیتږي. په ځانګړي ډول هغه وخت چې تاسو د کوم شي په اړه خبرې کوئ او د هغې په اړه معلومات نه لرئ.

څېړنه زیاتوي له ځان سره په خبرو کولو سره د ذهن تصویري نظام په حرکت راځي چې له امله یې ذهن تیزیږي.