ملګري ملتونه: ۳۰ ميلیونه ماشومان له سختي لوږې سره مخ دي

د ملګرو ملتونو د پنځو ادارو په ګډه اعلاميه کې راغلي دي چې اته ميليونه ماشومان د خوارځواکۍ له «وژونکې بڼې» سره مخ دي. په دې اعلاميه کې ويل شوي دي چې په چټکۍ سره لوړېدونکو بيو د خوراکي توکو د کمښت بحران نور هم شديد کړی دی.

همدا راز زياته شوې ده چې وسله والو شخړو، د اقليم بدلون پايلو او د کوويد – ۱۹ وبا ځانګړی منفي اغېز درلود. پر دې سربیره روغتيايي، د خوړو او نورو ژوند ژغورونکې خدماتو ته نه لاس رسی هم ورځ تر بلې سختيږي.

د ملګرو ملتونو په حواله په هغو ۱۵ هيوادونو کې چې وضعيت پکې ډېر خراب دی، افغانستان، ايتوپيا، هايتي، کينيا، نايجيريا او يمن شامل دي.

د ملګرو ملتونو د ماشومانو د مرستې ادارې «يونيسف» اجرايوي مشرې کاترين روسل، خبرداری ورکړ چې سخته خوارځواکي کیدای شي د مړينې سبب وګرځي او يا هم د ماشوم د بدن او مغزو وده د تل له پاره اغېزمنه کړي.

د ملګرو ملتونو د خوړو او کرهڼي ادارې «اف ای او» مشر کو دونګو وويل چې په ۲۰۲۳م کال کې به وضعيت «احتمالاً نور هم پسې خراب شي.» د نوموړي په حواله تر هغه د مخه چې ناوخته شي اضافي مصارفو ته اړتيا ده څو دا «بې ساري تقاضا پوره کړای شي» چې د دې پرمخ پر پراخيدونکې بحران له کبله رامنځته شوې ده.

کو دونګوزياته کړه چې هدف دا دی چې د خوارځواکۍ د مخنيوي له پاره په بېلا بېلو برخو کې کار وشي څو هغه مخشصه او تداوي شي. د ملګرو ملتونو سازمان په دې برخه کې د خوړو، روغتیا، پاکو اوبو ته لاس رسی، نظافت او د اجتماعي تامين سيسټمونو ته د مهمو نقطو په سترګه ګوري.

زیاته شوې ده چې په ځانګړي توګه هغو ماشومانو ته چې لا پنځه کلن شوي نه دي، د هغوی مېندو پلرونو او يا سرپرستانو، همدا راز مېندوارو او شېدې ورکوونکو ښځو ته بايد ډېره پاملرنه وشي او د هغوی د وضعيت د ښه کولو له پاره ګامونه پورته شي.

د خوړو او کرهنې د ادارې مشر ټينګار وکړ چې دا ډاډ بايد ترلاسه شي چې سالم خواړه باید «موجود، دلاس رسي وړ او ارزانه» وي.

دویچه ویله