ارواښاد يو رښتينی – سپېڅلی انسان او درنه سټه وه

انا لله وانا اليه راجعون

د ارواښاد لطيف لالا له غمځپلې کورنۍ سره د خواخوږۍ په پار

ارواښاد يو رښتينی – سپېڅلی انسان او درنه سټه وه

په خواشينۍ سره مو له رسنيو څخه د ارواښاد قانونپوه او نامتو وکيل عبداللطيف يا ((لطيف لالا)) د مرګ ((شهادت)) خبر ترلاسه کړ. ارواښاد لطيف لالا چې موږ ورسره له اتيايمې لسيزې راهيسې د اواره ګۍ په وخت کې په باړه خيبر ايجنسۍ کې نژدې پاتې شوي يو او همدارنګه بيا په نوييمه لسيزه کې د ارواښاد پروفيسور عبدالرسول امين د دفتر ((د ازاد افغانستان د ليکوالو ټولې [وفا])) چې وروسته بيا ((د افغانستان د مطالعاتو مرکز)) په نوم واوښت پېژندګلوي لرله.

له شک پرته ارواښاد لطيف لالا يو مينځلاری او د ستر پاچا خان د لارې يو پياوړی لاروی وو او تر کومه ځايه چې را ته روښانه ده لطيف لالا له ډېرو خلکو او ان زموږ له افغانانو سره چې په حقوقي بنسټونو کې به له ډېرو سختو ستونزو سره لاس وګرېوان وو. ارواښاد تل د بېوزلو لاسنيوی کړی او له هغوی سره به يې د خپل توان تر کچې په هر ډګر کې منډه وهله او مرسته به يې ورسره کوله. نوموړی د ارواښاد پروفيسور عبدالرسول امين خورا نژدې دوست او ښه ملګری وو.

ارواښاد يو نرم او د ورين تندي څښتن وو. له مېلمه خونې يعنې حُجرې او دېرې څخه يې بې چايو راوتلی نه شوې. ارواښاد يو ښه پياوړی ملتپال انسان وو. پر پښتنو او افغانستان مين انسان وو. زما د ترور ارواښاد څښتن سيد علي جان پاچا به چې کله هم ورغی او دی به په ځای کې وو، نو ډېر ښه ګپ شف به يې ورسره لګولو.

د ده دغه ناځوانه او بېرحمانه وژنه په خورا کلکو ټکو غندم. مړينه يې د لروبر ټولو پښتنو/افغانانو لپاره يوه لويه تشه ده. څښتن تعالی دې پرې ورحميږي، قبر يې روښانه او څښتن تعالی دې يې جنت الفردوس په برخه کړي.

اروا يې ښاده او ياد يې تل

سيد حسين پاچا

////////////////////////////////////////////////////////////////////////