په کندهار کي ۲۰ لا وراث جسدونه خاورو ته وسپارل سول

هغه زیاتوي: «دا ټول جسدونه د اسلامي شریعت له احکامو سره سم کفن او د جنازې مراسم يې ترسره سول او د ټاکل سوي پلاوي په حضور کي خاورو ته وسپارل سول.»

عام کندهاریان هم د کندهار ښاروالۍ دغه اقدام ستايي او غواړي، چي دغه ډول جسدونه په یوه ځانګړې هدیره کي خاورو ته وسپاري، تر څو که خپلوان يې وغواړي نو ژر يې پیدا کړلای سي.

د ښاروالۍ مسؤلین هم وايي، دغسي لا وارث جسدونه د کندهار ښار د ۱۳ حوزې په مربوطاتو کي خاورو ته سپاري او هر قبر خپله ځانګړې لوحه لري، چي له ورایه ور څخه د جسد عمر او د مړیني ځای او ځیني نوري نښي معلومیږي او په موندولو کي يې اساني پېښوي.

د کندهار د میرویس حوزوي روغتون یو تن ډاکټر د نوم او ږغ نه خپرلو په شرط دویچه ویله ته وویل، په دې کې اکثره جسدونه په ټرافیکي پيښو کي د وژل سويو مسافرو دي، چي دلته کندهار ته د خوارۍ مزدورۍ لپاره راځي.

کندهار د هیواد په سویل کي پروت هغه لوی ولایت دی، چي د زابل، روزګان او هلمند ولایتونو سربیره د یو شمیر نورو ولایتونو خلک هم دلته په خوارۍ مزدورۍ پسي راځي او یا هم له دې لاري هرات، کابل او ځینو نورو ولایتونو ته سفر کوي.