ستر سړی

کارل سیګان ته د “ساینس-مشهوروونکي” لقب ورکړل شوی و. سیګان ډېر پېچلي ساینسي مفاهم عامو خلکو ته ډېر ساده بیانول. د دې لوی انسان په خبرو او کتابونو کې انسانیت، عاجزي، مینه او ارمانونه له ورایه ښکاري.
دی انسان؛ مینې، عاجزي، ساده‌ژوند او تفکر ته هڅوي.

ده له ناسا وغوښتل چې د وایجر ون په وسیله له ډېرې لیرې واټن څخه د ځمکې تصویر واخلي. هغوی ومنله او په ۱۹۹۰ کال یې له ۶ میلیارد کیلومتره واټن څخه د ځمکې دغه عکس واخیست چې لاندې یې تصویر کې وینئ.
سیګان د دغه تصویر له لیدو وروسته ځمکه یو کوچنی کم رنګه ټکی وباله او په ۱۹۹۴ کال یې د “د کمرنګه شنه ټکي” په نوم کتاب هم ولیکل چې انسان خپل اهمیت او په عین حال کې کمزوري ته هم متوجه کوي.

ده د “Cosmos” په نوم یوه ټلویزوني خپرونه چلوله چې آن تر ۱۹۹۵ کال پورې یې شاوخوا ۵۰۰ میلیون لیدونکي لرل.
سیګان په ۱۹۳۴ کال دنیا ته راغی او په ۱۹۹۶ کال ترې لاړ.
دی په هاروارډ پوهنتون کې د ستورپوهنې معلِم و. خو، ده د پوهنتون نصاب ته ډېر نه کتل، په خپل سر به یې ځینې تدریسي چارې مخ ته وړلې، چې له همدې خاطره د نورو معلِمانو او ادارې نه خوښېده، بالاخره مجبور شو چې له هاروارډه کډه بار کړي.
کله چې له هاروارډه لاړ، په ۱۹۶۸ کال یې په کورنیل پوهنتون کې د ستورپوهنې معلِمي پیل کړه.

له ده را وروسته د ساینسي مسائلو د ساده تشریح په برخه کې نیل ډیګرس ټایسن خورا مشهور دی، چې په یوټوب کې د “Star Talk” په نوم اوس هم خپرونې کوي. خورا پېچلي ساینسي مفاهِم تر عامو خلکو اسانه رسوي.