په ناڅاپي ډول د سر د ګرځېدلو (تاوېدلو) سببونه څه کېدلی شي

کله ناکله د کار کولو یاهم د تګ پرمهال په ناڅاپي ډول د سر د ګرځېدلو یا تاوېدلو سره مخ کېږو، چې بیا مو په سترګو تیاره راځي او شاید داسې حالات کوم عام سبب ولري، خو ډېری وخت بیا ددې اړتیا پېښېږي چې ډاکتر ته مراجعه وکړو، نو راځئ چې نن ورځ د سر د ګرځېدلو ځینې عام سببونه ولولو.
که چېرته تاسې ملاست یئ، بیا غواړئ چې پورته شئ او کېنئ یا ولاړ یئ او په ناڅاپي ډول د سر د ګرځېدلو سره مخ کېږي، نو امکان لېدل کېږي، چې ستاسې د وینې فشار به ډېر کم شوی وي او په بدن کې مو د وینې دوران اغېزمن شوی. روغتیایي کارپوهان وایي کله چې یو څوک ملاست وي او بیا یو دم پورته شي، نو وینه یې په تېزۍ سره مازغو ته نه رسېږي، چې بیا په پایله کې د سر ګرځېدل رامنځته کوي. دوی زیاتوي که چېرته په تېزۍ سره خپل حالت بدلوئ او بیا د سر د ګرځېدلو سره مخ کېږي، خو که چېرته د سر د ګرځېدلو حالت مو ډېر لږ وي، نو له دې وروسته خپل حالت په کراره سره بدلوئ. خو که دې ستونزې ډېروالی وموند او په ښکاره ډول یې کوم سبب هم نه درلود، نو سمدستي ډاکتر ته مراجعه وکړئ.
روغتیایي کارپوهان وایي چې د سر د ګرځېدلو ستونزه د اوبو له کمښت سره هم رامنځته کېدلی شي. موږ په دې پوهېږو چې اوبه ژوند دی او د انسان د بدن له اړینو ضروریاتو څخه دي، کله چې د انسان بدن د اوبو له کمښت سره مخ شي، نو د وینې دوران یې اغېزمن کې د سر د ګرځېدلو ستونزه ورته پیدا کېږي.
دغه راز د سر د زخم یا د ضربې د خوړلو په صورت کې هم د سر د ګرځېدلو ستونزه رامنځته کېږي. که چېرته ستاسې سر له کوم شي سره ولګېږي، نو په ځنډ سره به د سر د تاوېدلو احساس وکړئ، خو که چېرته ستونزه ډېره شوه او زړه بدوالي او کانګې کول یې هم رامنځته کړل، نو سمدستي ډاکتر ته مراجعه وکړئ.
بله خوا د غوږونو میکروب هم د سر د ګرځېدلو سبب کېدلی شي. غوږ چې زموږ بدني اعتدال رامنځته کوي، د میکروبي کېدلو په صورت کې یې د سر ګرځېدل رامنځته کوي، چې په داسې حالاتو کې ډاکتر ته مراجعه کول اړین وي.