د هغه افغان کورنيو څخه کرکه لرم

د هغه افغان کورنيو څخه کرکه لرم؛ چې ځوى/ځامن ىې وحشي، عياش، بې لارې، چهار عيب شرعي، جاهل، د فسق و فساد ډک وي او د سړيتوب/ انسانيت معيارونه ونلري، خو کورنۍ به ىې واىې چې ښځه ورته کوو او هلک به اصلاح شي.

او د خداى لپاره د مور شيدې، د پلار ډوډۍ او نمک ىې خوړلى، وعظ او نصيحت یې اوريدلى…..هلک اصلاح نشو، نو يوه پردۍ جلۍ څنګه دا ځناور او بې لارې هلک اصلاح کړي؟! جلۍ بيچاره د خواښې، ايندور ګانو، ليور ښځو د جنګو او پيغورونو او د خسر، ليورنو، ميړه، د لښکر لښکر ميلمانه او ماشومانو د خدمت به اوﺯګاره نه وي؛ خو دوى به ترې د ژوند د ملګرى اصلاح تمه لري. ښځه به خپل ويښتو ږمنځولو، ځان سينګارولو، نظافت، ډوډۍ خوړولو، چکر، استراحت، مديتيشن، خريد کول، درس/ مطالعه………. او د کور سمبالښت د هنرونو کارونې ته به وخت نلري؛ خو خلک به ښځه په غوږ وهي ” ﺯن هم گرفت، خو اصلاح نشد!” چې يو بيل وي او په دا سرونه ورته ووهۍ، چې ښځه بيچاره مو لکه نوکره او خادمه استعمالوۍ او نه مو وخت ورکړى چې دوى خپلو کې سره کيني، چکر ته لاړ شي، خبرې وکړي، يو بل درک کړي، په مينه يو بل ته د ښه او بدو لارښوونه وکړي، د يو بل نيمګړتياوې او اړتياوې په ښه ډول پوره کړي؛ نو څنکه داسې تمه کوۍ!؟ اخره کې داسې ﺫهنيت لرونکي کورنيو ته بايد وويل شي چې؛ ستاسو کور کې د بيګشو پشان قوى، د رمستريو پشان چالاک، د جان سينا پشان قهرمان، د چګورا پشان انقلابى مارکسيست، د ولټِر پشان فلسفي شخصيت، د جان ویسلی پشان واعظ او نور ګڼ شمير افراد شتون لري او ځانونه درته کامل شخصیونه ښکاري؛ نو دا غضب (ورور/هلک،ځوى…) مو ولې اصلاح نکړل چې د ښځې نه ىې د هغه د اصلاح تمه کوۍ!؟

اصلا داسې هلکانو ته بايد کورنۍ ىې واده ونکړي تر هغې چې يا په وعظ يا د بيګشو، جان سينا او رمستريو نه ښه وهل وخوري او لارې ته برابر شي.

 خداى دې د افغانانو افکار سم کړي؛ چې کله هم د خپل ځوى لپاره د پرديو انجونو ژوند په جهنم بدل نکړي.