ملا هبت الله ادعا کوي چې د ښځو ټول شرعي حقونه حفظ دي

338
24 ساعتونه مخکې

د طالبانو رهبر ملاهبت الله آخوندزاده، په خپل د لوی اختر په مناسبت د مبارکۍ په پيغام کې ويلي دي چې په افغانستان کې د طالبانو په واکمنېدو سره د ژوندانه په مختلفو برخو کې «ديني اصلاحات جریان لري.»

آخوندزاده په دغه پيغام کې د ښځو موضوع ته هم اشاره او ادعا کړې چې ټول شرعي حقونه ېې تامین شوي خو د ښځو او نجونو د تعلیم موضوع ېې نه ده یاده کړې: «د اسلامي امارت په حاکمیت سره د مېرمنو د اجباري نکاح او په بدو کې يې د ورکولو په شمول له نورو ګڼور رواجي ظلمونو څخه د ژغورلو په خاطر لازم اقدامات ترسره شوي دي،  ټول شرعي حقوق يې تأمین شوي دي.»

ملاهبت الله آخوندزاده سربېره پر دې چې ښځې د ټولنې د نیمايي برخې په توګه منلې خو له دې سره ېې د هغوی د تعلیم مسئله چې د طالبانو له حاکمیت راهیسې ېې په افغانستان دننه او نړېواله سطحه د طالبانو پر وړاندې غبرګونونه راپارولي، څه نه دي ويلي. په پيغام کې دغې موضوع ته داسې اشاره شوې ده: «د ټولنې د نیمې برخې په حیث د میرمنو اصلاح، حجاب، عفت، له اختلاط څخه مخنیوي او د اسلامي شریعت تر سیوري لاندې د باسعادته ژوند په مسیر د برابرولو په موخه مهم اقدامات شوي دي.»

طالبان د ۲۰۲۱م کال په اګست کې پر افغانستان د بیا واکمنېدو راهيسې د ښځو د کار او تعلیم او نورو برخو کې يو لړ محدودیتونه وضع کړي دي. طالبانو په دې هکله د هېواد دننه مخالفتونو او د نړېوالې ټولنې د فشارونو باوجود، نه یوازې دغه محدودیتونه بېرته لري کړي نه دي، بلکې نور ېې هم سخت کړي دي. دا په داسې حال کې ده چې د طالبانو حکومت تر اوسه هيڅ هیواد په رسميت نه دی پېژندلی.

په وروستیو کې د افغانستان له پاره د ملگرو ملتونو استازې وويل، ترڅو چي د ښځو پر حقونو محدوديتونه همداسي پاته وي، د نړيوالې ټولنې له خوا د طالبانو د حکومت په رسميت پيژندل «تقريباً ناممکن» دي.

په کابل کې د ښځو لاريون
په کابل کې د ښځو لاريونانځور: AFP/Getty Images

روزا اوتونبايوا د چهارشنبې په ورځ د جون ۱۴مه د ملگرو ملتونو امنيت شورا ته وويل: «زه د طالبانو له دوفاکتو يا بالفعل ادارې سره په منظم ډول د خبرو اترو په حال کي يم،  زه د هغو خنډونو په هکله چي د ښځو او نجونو پر وړاندي يې د فرمانونو د صادرولو او بنديزونو د وضع کولو له لاري رامنځته کړي، ډېره جدي باخبره يم.»

طالبانو له اسلامي شريعت څخه د سختدريځ تفسير پر اساس، پر ښځو او نجونو ډېر محدوديتونه وضع کړي دي چي پکښي له شپږم ټولگي څخه پورته صنفونو کي د زده کړو ممنوعيت، د عالي تحصيلاتو بنديز او په ډيرو څانگو کي د کار کولو محدوديت شامليږي.

د طالبانو مشر اوس په خپل اختریز پیغام کې ويلي دي چې دوی «د ټولې نړۍ په ځانګړي توګه له اسلامي هیوادونو سره» ښې اقتصادي او سیاسي اړيکي غواړي او ترڅنګ ېې ويلي دي بهرني هیوادونه دې د افغانستان په کورنیو چارو کې لاسوهنه نه کوي: «لکه څرنګه چې موږ د نورو هیوادونو په کورنیو چارو کې لاس وهنه نه کوو، همدا ډول نورو ته هم اجازه نه ورکوو چې په هيڅ بهانه او عنوان زموږ په کورنیو مسائلو کې مداخله ولري او یا موږ ته لارښوونې وکړي.»

طالبان له اسلامي شریعت څخه د خپل دغه ډول تفسیر پر اساس وايي چې د ښځو حقونو ته درناوی کوي او د هغوی د حقونو اعادې ته ژمن دي.

د ملا هبت الله آخوندزاده د اختر مبارکي په اوږده پيغام کې په افغانستان کې د حکومتدارۍ، اقتصاد، امنیت، د خپلواکي د بيا تامين، سرتاسري ملي یووالي او د تعصباتو د لمنځه وړو په ګډون ګڼو مسایلو ته هم اشاره شوې او ادعا ېې کړې چې په کې پرمختګونه شوي دي.

دویچه ویله

**************************************

د دعوت رسنیز مرکز ملاتړ وکړئ
له موږ سره د مرستې همدا وخت دی. هره مرسته، که لږه وي یا ډیره، زموږ رسنیز کارونه او هڅې پیاوړی کوي، زموږ راتلونکی ساتي او زموږ د لا ښه خدمت زمینه برابروي. د دعوت رسنیز مرکز سره د لږ تر لږه $/10 ډالر یا په ډیرې مرستې کولو ملاتړ وکړئ. دا ستاسو یوازې یوه دقیقه وخت نیسي. او هم کولی شئ هره میاشت له موږ سره منظمه مرسته وکړئ. مننه

د دعوت بانکي پتهDNB Bank AC # 0530 2294668 :
له ناروې بهر د نړیوالو تادیاتو حساب: NO15 0530 2294 668
د ویپس شمېره Vipps: #557320 :

Support Dawat Media Center

If there were ever a time to join us, it is now. Every contribution, however big or small, powers our journalism and sustains our future. Support the Dawat Media Center from as little as $/€10 – it only takes a minute. If you can, please consider supporting us with a regular amount each month. Thank you
DNB Bank AC # 0530 2294668
Account for international payments: NO15 0530 2294 668
Vipps: #557320

Comments are closed.