لنډی او لنډپاری

د خبرو دغه زخم له ده خپلې ټولې ګواښنې او خبرداري هېر کړي، ځکه خو اوس دا نه وايي چې د کېم جونګ سابه به ور په مالګه کړي، يا به د امريکا په يوه ګوزار د شمالي کوريا ډيکټېټر رژيم د تاريخ برخه وګرځوي.

ځکه خو اوس له شمالي کوريا او خپله کېم جونګ سره روغې جوړې او د خبرو اړتيا ته ورګرځېدلی، له همدې ځايه د خپل کرکټر او مزاج پر خلاف وايي، ده کېم جونګ لنډی او پنډ نه دی بللی، نو ده څنګه زه زوړ بللی يم؟
يو څوک د قد او ونې له امله لنډی يا مندری باله شي، خو د نورو که څه هم ونې ښې اوږدې اوسي، خو لنډيان يا لنډپاري را خېژي چې د ونې له لنډي خطرناک وي.
مرحوم غني خان لنډی د سخوندر په مانا را اخيستی؛
بابا وې غني سړی شه جېل ته ولاړ شه
غني وې بابا لنډی نه دی د خټو

په نارينه‌وو کې ټرمپ ښايي لومړنی يا يوازېنی کس وي چې د عمر په اړه دومره حساس راوځي، که نه دغه ستونزه ښځينه‌وو ته پېښه ده، يوازې د ښځينه‌وو ځانګړتيا يا کمزوري پېژندل شوې ده.
داسې ګڼل کېده چې که ولسمشر ټرمپ له کېم جونګ اون سره په ناندريو کښېوزي، ماشوم به يې ياد کړي او په لويه تنه به له يوه ماشوم يا ژڼکي سره ځان په يوه جوال کې نه اچوي.

دلته چې په موږ کې کوم ژڼی د کار خبره وکړي، ماښوم يې ګڼي او وينا يې د نوټس وړ نه بولي چې له مشر سپين‌ږيري دغسې کومه خبره واوري اپلتې ورته ښکاري، ځکه خو دلته د کار خبرې يا چارې ته غوږ نه‌شي نيول کېدای.
له ګدا تر پاچا دغه احساس زموږ ټولنيز حقيقت ګرځېدلی، ولسمشر غني هم له دې څخه مستثنا نه دی، ځکه خو ځان عقل کل ورته ښکاري، د نورو خبرو ته يوازې ګوري، له اورېدو يې عاجز دی.

د رولا خبرې چې د سر او زړه په غوږو اورېدلای شي، هغه د مړې ګېډې پاړسي ورته غږوي، ځکه خو دی يوازې د خبرو له ليدو څه تر لاسه کولای شي.
کېم جونګ اون د ډېری ځوانانو فېن دی، د ده د وېښتانو سټايل نن سبا يو منلی موډ ګرځېدلی، په دې سربېره دی د مزاحمت سيمبول هم پېژندل شوی.

په نړۍ کې يوازېنی ولسمشر دی چې له امريکا سره يې له ډغرې پښې نه رپي، داسې نه دی لکه القاعده او دا نور اورپکي چې زور دې د ملخ، ورځې پر مخ!
دی له امريکا سره خپل زور برابر ګڼي، يا يې د برابرولو په هڅه کې دی.
د پاړسي يکې بګو دو تا بشنو همدې ته وايي. که نه د شوروي اتحاد او کمونيزم تر نړېدو وروسته د امريکا سترګه له چا نه‌‎ سوځېده.

په امريکا کې که کوم مسلمان په جرم او جنايت کې ښکېل شي، له واره د مذهبي ترهګري او اورپکي دوسيه پسې را وباسي، خو که کوم سپين پوټکی لسګونه کسان ووژني، د ډاکټر او روغتون پر ځای، ټرمپ د عصبي ناروغ او لېونتوب تصديق ور لاسليک کړی وي.

سرخط ورځپاڼه