بد ماشومان د ناکامو ښځو زامن دي / جمشيد غزنيوال

په کليوالو سيمو کې بيا دغه دود نور هم ستونزمن دی، ځينې ماشومان شيان غلا کوي، ځينې جنګ کوي، ځينې اور بلوي او چا بيا په سپي پسې لوټې اخيستې وې…
دلته موږ ځينې هغه لارې وړاندې کوو چې کولای شو ماشوم پرې مهار کړو.

• ماشوم د نورو تر مخ مه وهئ
ځينې مېرمنې عادت وي چې د مېلمه يا د خپل کوربه تر مخ ماشوم سوکان کش کړي، په ژړا يې تک شين واړوي، بيا نو پخپله د حقارت له احساسه ورو ورو خاندي.
ښه دا ده چې تاسې ماشوم ته ټولې هغه خبرې په يوازېتوب کې وکړئ چې د نورو تر مخ يې له هغه عملي کول غواړئ. که فکر کوئ چې ماشوم به شيريني بې‌درکه خوري، د بېولو په وخت کې يې خوله ورخوږه کړئ او شيريني داسې ورته ښکاره کړئ چې کور ډېره ده او څوک يې له چا نه ګرځوي. داسې نه چې تاسې يې ووهئ، ځکه له ماشوم سره خشونت هغه پايله لري چې ميندې يې نه غواړي.

• د ماشوم غوښتنې معقولې ور پوره کړئ
دا سمه ده چې ماشوم بايد رشوتخور اموخته نه‌شي، مګر پر هغو اړتياوو يې ژور غور وکړئ چې پوهېږئ له ناسمې لارې يې پوره کوي. غوښتنې په ځپلو او پټولو نه ورکېږي، يوازې حل کول دي او بس.

• جديت او خندا مو سره بېل کړئ
ځينې ښځې د خپل جديت او مزاحيه حالت تر منځ کرښه نه‌شي کشولای، که تاسې ماشوم ووهئ او بېرته ځای پر ځای ورته وخاندئ، سوړ او تود به شي. بيا به مو نه پر ټوکه خوشالي او خندا ته زړه ښه کولای شي او نه به مو غوسه او جديت پېژني. اخلاق په خشونت کې نه دي او مينه هم يوازې د جديت ختمولو ته نه وايي. دغه حدود که سره بېل نه‌شي، ماشوم له تاسې سره سالمه رابطه نه‌شي تضمينولای.

• پاک کالي ور واغوندئ
که مو ماشوم پاک وي، يو خو شوخي ډېره بده نه ورسره ښکارېږي، بل دا چې کله ماشوم ځان تر نورو ټيټ احساس کړي، په شوخي يې د پوره کولو هڅه پيلوي. د دغې شوخي حدود نه ورته مالومېږي او کله چې تاسې پرې خبرېږئ، هر حيثيت ته يې ګوړه ور تللې وي.

• په خپل نامه يې ياد کړئ
که ماشوم ته خپل نوم واخلئ، پنځوس فيصده مو نظر مني. دغه شی همدا اوس و ازموياست.

• غوږ ورته ونيسئ
کله کله ښځې په خپلو بنډارونو کې ماشومان يوازې په بهر ته شړلو اړ کوي، کله چې تاسې د هغوی عادي خبرو ته غوږ و نه نيسئ، ډېر ژر به يې له دباندې چيغې او نارې واورئ. ماشومان په يوه واړه تاييد هم لوی زړه پيدا کولای شي. ښايي د هر بد ماشوم تر شا يوه ناکامه مور موجوده وي.

سرخط ورځپاڼه