عبدالباري جهاني: د مولوي له مثنوي څخه
یو عرب وو په صحرا کي را روان وو
سره غرمه وه لار اوږده بټي بیابان وو
دوه جواله یې پر اوښ وه را بارکړي
پر دې لاره به یې سل ځلی وه وړي
لا پخپله هم د بار په منځ کي سپور وو
ښکارېدی چی بار یې دروند وو پر اوښ زور وو
بل ملګری هم په لار کي ورپیدا سو
په خبرو په کیسو ورته ګویا سو
په یو ترڅ کي یې ترې وکړله پوښتنه
چي پر اوښ دي څه بار کړي دي څښتنه
عرب وویل غنم کلي ته وړمه
او دا بل جوال د رېګو چلومه
نو د دواړو خواوو تول به برابر وي
هسي نه چي یې یوې خواته لنګر وي
سړي وویل زما ومنه که ښه کړې
بار به سپک سي او هوسا سفر به وکړې
ځان بېغمه کړه د رېګ له زحمتونو
غنم ووېشه پر دواړو جوالونو
پر خپل اوښ به دې بار سپک سي ښه به ځغلي
بېله ځنډه به دې یوسي تر خپل کلي
د عرب خبره زړه ته سوله تېره
د ملګري یې سلا خوښه سوه ډېره
خو حیران سو چي سړی دومره هوښیار دی
نو پیاده څنګه روان پر دغه لار دی
ډېر یې زړه سو چي له ځان سره یې سپور کړي
او په کلي کي مېلمه یې پر خپل کور کړي
له سړي څخه یې پیل کړلې پوښتني
د کسبونو جایدادونو ګروېږني
چي ته څوک یې ته پر کوم لوري روان یې
چي ملګری د سفر مي د بیابان یې
ته چي دومره یې هوښیار نو به وزیر یې
سلا کار به د پاچا او د امیر یې
سړي وویل کالیو ته مي ګوره
نه وزیر نه سلاکار یمه زما وروره
څو اوښان لرې څو غواوي څو پسونه
څو دوکانه څه رختونه څه مالونه
سړي وویل نه غواوي نه اوښان سته
نه درک مي د مالونو نه دوکان سته
څه پیسې لرې څه زر څه مرغلري
که نه څنګه دي زده کړې دا خبري
او که نه وي نو حتما به کیمیاګر یې
زر له مسو څخه باسې جادو ګر یې
سړي وویل قسم دی چي مسکین یم
دا خپل عقل مي دښمن دی تل غمګین یم
نه مي علم نه هنر په درد لګېږي
نه د عقل پوهي ګټه را رسېږي
سر مي لوڅ دی پښې مي لوڅي په تن خوار یم
چي هر څوک مي کړي مېلمه ورته تیار یم
عرب وویل له مخه مي سه لیري
چي خبري دي ترخې لګېږي ډېري
هسي نه چي شوم اثر دي پر ما پرېوزي
ستا شامت به مي په پاکو وینو کښېوزي
بلا توره دي پسې ستا په هنر سي
عزراییل دي ستا پر عقل برابر سي
بخت دي تور عقل کوټه دی خدای لیدلی
په دښتونو کي چي ګرځې وږی پلی
ته چي هري خواته ځې ځه پر هغه ځه
زما پر لاره برابر راسره مه ځه
په یوه جوال کي رېګ بل کي غنم وي
هغه ښه دي نه چي ستا پر عقل سم وي
ستا تر پوهي مي خپل نیم عقل په کار دی
نس مي موړ دی تن مي پټ دی اوښ مي بار دی
څه په کار دي حکمتونه او عقلونه
چي نه زر لرې نه مال وي نه آسونه.
د دعوت رسنیز مرکز ملاتړ وکړئ
له موږ سره د مرستې همدا وخت دی. هره مرسته، که لږه وي یا ډیره، زموږ رسنیز کارونه او هڅې پیاوړی کوي، زموږ راتلونکی ساتي او زموږ د لا ښه خدمت زمینه برابروي. د دعوت رسنیز مرکز سره د لږ تر لږه $/10 ډالر یا په ډیرې مرستې کولو ملاتړ وکړئ. دا ستاسو یوازې یوه دقیقه وخت نیسي. او هم کولی شئ هره میاشت له موږ سره منظمه مرسته وکړئ. مننه
د دعوت بانکي پتهDNB Bank AC # 0530 2294668 :
له ناروې بهر د نړیوالو تادیاتو حساب: NO15 0530 2294 668
د ویپس شمېره Vipps: #557320 :
Support Dawat Media Center
If there were ever a time to join us, it is now. Every contribution, however big or small, powers our journalism and sustains our future. Support the Dawat Media Center from as little as $/€10 – it only takes a minute. If you can, please consider supporting us with a regular amount each month. Thank you
DNB Bank AC # 0530 2294668
Account for international payments: NO15 0530 2294 668
Vipps: #557320
