ډاکټرغني دې بیا راشي/ محمدروښان ښاد

د ډاکټر محمد اشرف غني د فکر، هڅو، بریالۍ ډيپلوماسۍ، اقتصادي او ملي برنامو، پیاوړي منطق، پوهې او پرېکنده دریځ له برکته افغانستان د ښه والي په لور حرکت پیل کړی، خو لا یې هم دغه مزل خپل مقصود منزل ته نه دی رسولی. د دې لپاره اړتیا ده چې ډاکټر غني یو ځل بیا راشي.

ډاکټر غني تېر ځل په بدو شرایطو کې واک ته ورسېد، ځکه له یوې خوا بهرنیان نه یوازې له هیواده په وتلو وو، بلکې د ولسمشر کرزي د دیارلس کلنې فاسدې او بې کفایته واکمنۍ له امله یې زړونه خوړین وو. پر افغانستان یې خپل باور له لاسه ورکړی و. دوی ویل چې دا وطن د سپي کږه لکۍ ده هیڅ نه سیخېږي.

بل لورته فساد اوج ته رسېدلی و، مافیایي کړۍ ځواکمنې شوې وې، د دولت قراردادونه دوی اخیستي و، په ادارو کې ناست مسوولین هم د دوی لاسپوڅي او  خواخوږي وو. وطن په بحران کې په غرقېدو او هیوادوال د نهیلۍ څپې په مخه کړي وو.

ولسمشرغني ملا وتړله، ټاکنې یې وګټلې، خو د ټلوالې د سپین سترګۍ او د بهرنیانو د مداخلې له امله یې د غني ګټلی واک ووېشه، عبدالله یې ورشریک کړ او بیا چې څه مافیا او مفسدین وو، نو د عبدالله له لارې یې حکومت ته لاره ومونده، د ولسمشر غني ټوله انرژي او زیات وخت له عبدالله سره په ناندریو او حداقل د هغه د بې کفایتیو او نادودو په دفعه کولو او رفعه کولو ولګېده.

که چېرې د ولسمشر غني په تېر حکومت کې اجرائیه ریاست نه وای ور ټومبل شوی، نو باور دی چې افغانستان به د اوس دوه هومره پرمختګ کړی وای او په هره برخه کې به یې ګڼې لاسته راوړنې لرلی، مګر د دې ستونزو، مزاحمتونو، لاسوهنو او ناغېړیو باوجود هم افغانستان په نړیواله، سیمه ییزه او ملي کچه ګڼې لاسته راوړنې او پرمختګونه لري.

په تېرو څلور نیمو کالو کې موږ ولیدل چې د فساد ضد مبارزه چټکه او موثره شوه. ترانزیت او اقتصادي همکاریو ته پام زیات شو، ملي او سیمه ییزې پروژې پیل او پلې شوې او لا هم د پلې کېدو په حال کې دي. پر پاکستان تکیه او انحصار ختم شو، ګڼې ترانزیتي لارې پرانیستل شوې، سوداګري وغوړېده، ادارې هم ځوانې شوې او هم فعاله شوې.

د سولې هڅو رنګ راوړ، سوله کې پرمختګونه وشول او لا هم باور دی چې د ښاغلي غني د هڅو له برکته به وطن ته تلپاتې سوله راشي، امنیتي او دفاعي ځواکونه غښتلي شول، مسلکي شول، وروزول شول، دوی ته د نړیوالو او هیوادوالو ملاتړ جلب شو. دوی په خپلو سرښندنو او مبارزو د ټولو باور او ملاتړ ور خپل کړ او لا هم د دوی د پیاوړتیا لپاره جدي هڅې روانې او نړیوالې ژمنې موجودې دي.

د ډاکټر غني ډېرې برنامې خصوصاً د ترانزیت، زیربنا، د بندونو د جوړولو او اوبو د مهارولو او د افغاني تولیداتو د زیاتوالي او نورو برخو کې ډېر پلانونه لا نیمګړي پاتې دي. د دغو برنامو تطبیق ته افغانستان جدي اړتیا لري، ځکه دا هغه څه دي چې افغانستان په پښو ودرولی شي، نو ځکه باید غني یو ځل بیا راشي او افغانستان د پرمختګ او ځان بسیاینې په لور سوق کړي.