له اوربند څخه د طالبانو وېره

اېمل پیاوړی

تېر کال نېکمرغه کوچنی اختر د ولسمشر غني له لوري د اعلان شوي او د وسله والو طالبانو له لوري د منل شوي اوربند له برکته له خوښیو ډک اختر ځکه و، چې هیوادوالو مو په کې د بې موجبه وژنو او قتلونو خبرونه وانه ورېدل او هر څوک هر چېرې چې یې زړه غوښتل له کومې وېرې پرته په ډاډ تللی شو. حتی وسله وال طالبان له خپلو وسلو سره ښارونو او د امنیتي او دفاعي ځواکونو سیمو ته ورغلل او یو بل سره یې خواله وکړل.

سږکال هم د ټولو افغانانو هیله دا وه چې یو ځل بیا د نېکمرغه کوچني اختر په ورځو او شپو کې اوربند وشي او دغه اوربند بیا په دایمي اوربند بدل شي. حکومت او په ځانګړي ډول ولسمشر غني بار بار د اوربند غوښتنه وکړه او د حکومت له لوري یې خپل چمتووالی وښوده. د سولې مشورتي لویې جرګې د غړو او په مسکو کې د افغان سیاسیونو او وسله والو طالبانو د استازو غونډې هم د اوربند غوښتنه وکړه، مګر وسله والو طالبانو د اوربند په اړه دا ټولې غوښتنې رد کړې، ځکه د تېر کال اوربند ته په کتو وسله وال طالبان له اوربند څخه سخته وېره لري.

له اوربند څخه د وسله والو طالبانو وېره په دې ده چې د دوی جنګیالي ښارونو ته ځي، هلته په تلوحقایق درک کوي او د مشرانو او د دوی د بهرنیو ملاتړو له لوري چې د افغان دولت او افغانانو په اړه کوم ناسم فکر ورکړل شوی او غلط تبلیغات ورته شوي دي هغه درک کوي او بیا یې جنګي روحیه نه یوازې کمزورې کېږي ، بلکې د جنګ له لیکو څخه عادي ژوند ته ور ستنېږي، ځکه تېر کال چې کوم طالب جنګیالي خپلو کلیو، کورونو، سیمو او ښارونو ته لاړل، نو د حقایقو له درک کولو وروسته دوی بېرته نه یوازې خپلو لیکو ته ور ستانه نشول، بلکې دوی په خپلو تېرو کړنو پښېماني وښوده او دوی پوه شول چې په ناحقه جنګېدلي دي.

په دې وروستیو کې دا اوازې وې چې وسله وال طالبان به د اختر په ورځو او شپو کې جنګ او عملیات او بریدونه ونه کړي، یانې په یو ډول غیر رسمي اوربند به وکړي او همداسې یې وکړل، ځکه چې له رسمي اوربند څخه یې وېره وه او جنګ یې ځکه ونه کړ چې دوی پوهېدل چې ورځ تر بلې په ټولنه کې د خلکو کرکه د دوی پر وړاندې را پارېږي، ځکه نو غلي پاتې شول.

دا ټول د ولسمشر غني د فکر او هڅو برکت دی، ځکه چې نوموړي د وسله والو طالبانو او نورو تروریستي ډلو د کمزوري کولو او ځپلو لپاره په اساسي لارو فکر وکړ او تر ډېره د دوی د منابعو د وچولو او له دوی څخه د جنګ د مشروعیت په اخیستلو تمرکز وشو او له دې کار سره وسله وال طالبان او د دوی کړنې وننګول شوې او دا حقیقت ټولو افغانانو درک کړی چې وسله وال طالبان په غلطه دي، دوی په حقیقت کې له خپل ولس، هیواد او نظام سره په یوه نامشروع او پردۍ جګړه کې ښکېل دي او باید دغې جګړې ته د پای ټکی کېښودل شي.