طالبان ولې له مخامخ مذاکراتو وېرېږي؟

اصلي پوښتنه داده چې د طالبانو رهبري ولې له افغان دولت سره له مخامخ خبرو څخه وېره لري؟

که څه هم په ښکاره ځینې وایي دوی په دې ډول غواړي چې افغان دولت کم ارزښته کړي او یا فکر کوي چې ټول واک له امریکا سره دی او په دې خاطر له امریکا سره د سولې مذاکرات کوي، مګر دا منطق غلط ځکه دی چې که واک له امریکا سره وای، نو ولې په نهو میاشتو کې د مسلسلو مذاکراتو باوجود دوی حداقل یو توافق ته سره ونه رسېدل او د ډونالډ ټرمپ له یو ټویټ سره هر څه په سیند لاهو شول او د سولې مذاکرات په ټپه ودرېدل.

اصل خبره داده چې وسله وال طالبان د مذاکراتو لپاره داسې څه نه لري چې بحث ورباندې وشي او یا یې دوی د دلیل په توګه وړاندې کړي. بل عمده دلیل یې دادی چې د طالبانو مشران له دې وېرېږي چې که دوی د سولې مذاکراتو ته کېني، نو جنګیالي به یې خپلو کورونو ته ستانه شي چې دوی به یې د بیا راټولېدو وس ونه لري او دریم دلیل یې دا هم کېدای شي چې د طالبانو مشران سولې ته لېوال نه دي او نه غواړي چې سوله وکړي، ځکه د دوی ګټې په جنګ کې خوندي دي. بل دلیل یې دا هم کېدای شي چې وسله وال طالبان د سولې د مخامخ مذاکراتو اجازه نه لري او نه هم دا حق ورکول کېږي.

له کوم وخت راهسې چې ولسمشر محمد اشرف غني دا خبره کړې چې مونږ به له افغان طالبانو سره مخامخ د سولې مذاکرات پېل کړو، له همغه وخت راهیسې پاکستان حکومت یو ځل بیا پر افغان خاوره باندې بريدونه شروع کړي، تر څو یو ځل بیا بدبیني او بې باوري زیاته کړي او د سولې هڅې له مينځه یوسي.