قضايي لمونځونه څنګه ادا کېږي؟

حديث شريف
د چا څخه چې لمونځ هير شي او يا خوب وړی وي او لمونځ ترې قضا شي، د هغه کفاره دا ده چې کله ور په ياد شي او يا له خوب ويښ شي نو بايد قضا لمونځ را وګرځوي.
(صحيح مسلم 684-315/477/1)
که له چا څخه د سستۍ له امله لمونځونه قضا شوي وي او وروسته توبه وباسي، يوازي توبه بسنه نه کوي، بايد د لمانځه قضايي راوړي، قضا داسې کېږي، چې که د قضا شوي لمونځونو شمېر معلوم وي، ښه او که شمېر يې معلوم نه وي، نو پخپل غالب ګمان به قضا شوي لمونځونه بغير د مکروه وختونو نور په هر وخت کې ادا کولای شي. خو د قضا لمونځ راوړل بايد مسلسل په ترتيب سره ترسره شي.
مثلاً: نيت به داسې کوي، زما نيت دی د لومړي سهار چې پر ما يې قضايي شته.
زما نيت دی د لومړي ماسپښين/مازيګر يا ماسختن چې پر ما يې قضايي شته.
زما نيت دی د لومړي ماښام چې پر ما قضايې شته
داسي به د دوهم سهار، ماسپښين، مازيګر، ماښام يا ماسختن قضايې راوړي.
دريم سهار، ماسپښين، مازيګر، ماښام يا ماسختن
همداسې په ترتيب سره به قضايې اداکوي، تر څو خپل غالبا قضا شوي لمونځونه ادا کېږي.
يوازي د فرض لمونځ قضايي راوړل کېږي، خو د سهار د سنتو او ماسختن د وتر واجبو قضايي هم بايد راوړل شي، ځکه چې په اړه يې ډېر تاکيد شوی.
مکروه وختونه درې دي.
۱. د سهار له لمانځه وروسته تر لمر ختو پورې
۲. د غرمه مهال
۳.د مازيګر لمانځه نه تر ماښام لمانځه پورې
خو تر ټولو غوره او اسانه لار داده، چې د هر وخت لمانځه سره د هماغه وخت قضايې راوړل شي.