روژه والې لنډۍ/ دویمه برخه

اوس مې دې پلار سرسایه ورکړي

بله روژه به زه د یار په څنګ کې یمه

اول روژه او بیا اختر وي

په بېلتانه پسې وصال دی را به شینه

آخر روژه پسې اختر دی

د دیدنونو وار به راشي سیل به وینه

آخر کې ډکی ورنه جوړ شي

چې په نهاره هره ورځ څوک روژه وینه

آذان په وخت وکړه طالبه

زه به روژه د یار په کوکه ماتومه

آشنایه شونډې مې شکرې

په رمضان کې پېښه مه کوه مینه

بې له ادکې پړشمی دی

ډوډۍ بې خونده، اوبه زهرو غوندې دینه

بې له ادکې ماښامی وو

په روژه ماتي کې سلګو نیولی ومه

بېکاري، لوږه دواړه راغلل

له دغو دواړو به روژه څه خیر کوینه

بېګا رانغلې کبرجنې

په روژه ماتي کې مې ډېر ژړلي وونه

بېلتون په شان د روژې راغی

له خیره یار به د اختر په شان راځینه

بیا په وطن کې روژه راغله

قاریان د ختم په مستۍ راغلي دینه

بیا د روژې ماښام را خور شو

خواران روژه په وچه ټکله ماتوینه

پاڅه آذان را باندې وشو

خوږو شېبو د پړشمي نه وویستمه

پاس په سینه دې آموخته کړم

اوس په روژه کې ما ته نه راځي خوبونه

پراټې واخله رانه لاړ شه

زما روژه خوره یاره څه درشوي دینه

پردی وطن، پردی ماښام دی

د روژه ماتي پکې نشته دي خوندونه

پړشمي خوب راڅخه واخیست

د نن روژه به خدایه څنګه تېرومه

د پاملرنې وړ: لنډۍ د ملت اېجاد دی او مالکیت یې د پښتني ولس په فرد فرد پورې اړه لري. د روژه والو لنډیو دریمه برخه به ژر خپره شي، له موږ سره اوسئ…