پر ادبیاتو خبري: د شعر له زاوېې د هنر جلوې

د شعر د دروني څڅوبي له مستور بهیره د انساني شعور اولاشعور ذوقي تنده اوتمایل شادابه او خړوبېږي، شعر د غيرملموسي نړی له تل څخه د ملموسي دنیا د انتظام لپاره هم خورا ګټوري هنري نسخې لري او د ژوند اړوندي باریکي اوتاریکي زاویې ښه په کارنده توګه روښانه کوي، د هنرونو د جادویې کهول له محوري برخي څخه یوعمده اړخ د شعر نقش او عملي کردار دی، شعر مونږته د طبیعت د ښکلاګانو ګونګه ژبه په خبرواوسندرو راولي، شعر د ژوندانه ناليدلي او ناویل سوي ګوټونه د ناخبري ټولني د باطني سترګو جلبونکي منظرته نېغ دروي، شعر د حقیقت پلټني او حقیقت موندني اوږده مزلونه د یوې شاعرانه جملې په هنري جاموکې داسي رالنډوي چې د نور فکري اوشعوري مزله اړتیاته هيڅ ځای نه پاته کېږي، که څوک د هستی پر ناڅرګندو ښکلاګانو د منظر اودیدار ذوقي پل ګرد غواړي نو د شعر چټک سپاهي دغه سفرته خورا چمتو او مناسب ښکاري، هغه ژبه هغه سترګي او هغه ناخوداګاه حس چې د شعري وجود په تخیلي او کمالي اډانه کې شتون لري زه فکر نه کوم چې د غوره هنرونو په کوم بل قالب کې دي په دغه انداز موجود وي.

شعر د مبالغې له پریمانه اوبهانده سرچینې څخه خورا په ډک لاس خپل د لفظونو د ښایست خیرات وېشي، اما دا هنري مبالغه د حقیقت له تومنې په یوډول نه يوډول خونداورنګ اخلي، په شعرکې د ډېرو هنرونو ځلبلاندي جلوې سترګکونه وهي، د شعر په دننه ژوروکې مونږ موسیقي اورو، د ښکلاتنده خړوبوو، د ښکلو انځورونو تخنونکې ننداره کوو، د تصوف اوعرفان د اسرارو دنیاته ورننوزو، د سیاست اوټولنیز ژوند هراړخیزه څکه محسوو، اوبلاخره د ژوند اصلي کیف او ماهیتي خوند څکو، بنا” د شعر رنګیني زاويې د ژوند له بېلابېلو اړخونو څخه ډول ډول کیفیتونه او رنګارنګ حالتونه را ډالی کوي، که ژوندته د شعر له نرم ليدلوري په شاعرانه منطق وګورو نو د مینه ناک اومین ژوندښکلې تجربه به مو نه وي کړې؟

په پېرزوینه اودرناوي.

١٩\٣\١٤٠٢

**************************************