سږ کال د نوبل د ادبیاتو جایزه نارویژی الاصله شاعر او نمایشنامه لیکونکي یون فوسه ته ورکړل شوه

سږ کال د نوبل د ادبیاتو جایزه نارویژی الاصله شاعر او نمایشنامه لیکونکي یون فوسه Jon Fosse ته ورکړل شوه.هغه د ۱۹۵۹ ام کال د سپتامبر پر ۲۹ مه د نروژ په هوګسوند کې زېږېدلی او د برګن په پوهنتون کې یې تطبیقي ادبیات لوستي دي.
فوسه د نروژ او نړۍ له ډېرو مطرحو شاعرانو،لیکوالو او نمایشنامه لیکونکو څخه دی.
فوسه ته د هغه د آثارو په خاطرمعاصر هنریک ایبسن وایي، دا ځکه چې د ده نمایشنامې د نمایشي سنت مډرن دوام ګڼل کېږې او نمایشي سنت په نونسمه پېړۍ کې د نارویژي لیکوال هنریک ایبسن له خوا ایجاد شویدی.سنتی نمایش هغو نندارو یا نمایشونو ته وایي چې د یوه خاص قشر، اتنیکي ډلې او خلکو په عقایدو ، باورونو او انګېرنو کې منل شوي وي.
یون فوسه په ۱۹۹۲ کې د (یو څوک را روان دی) په لیکلو د نمایشنامه لیکونکو پر ټولي ورګډ شو، له همدې وخته تر اوسه د هغه ډېر شمېر آثار خپاره او د لوستونکو له هرکلي سره مخ شول. د فوسه آثار د دنیا څلوېښتو ژبو ته ژباړل شوی، چې له هغې ډلې ایراني لیکوال او ژباړن محمد حامد د نوموړي پنځه اثره (د نمایشي آثارو ټولګه)(ښکلې او د مني تصور)(پر څوکۍ ناسته جنکۍ)(شپې خپلې سندرې ویلې) او (زېړجمپرې جنۍ)فارسي ته ژباړلي دي. زه نه یم خبر چې د دغه معاصر او یاد لیکوال کوم اثر تر اوسه پښتو ته ژباړل شوی دی او که نه.
له یون فوسه تر نمایشنامو سربېره د شعر، لنډو کیسو او مقالو ټولګې هم خپرې شوېدي. د یادولو وړ ده چې د نوبل د ادبیاتو له سږنۍ جایزې سره یوولس میلیونه سویدي کرون (نیژدې یو میلیون ډالر)هم مل دي.