ايران اوس شنې په ښکاره چيچي

افغانستان په فراه کې له ايران سره دوه سوه او نهه اتيا کيلو مټره شريکه پوله لري او تر لاسه شوي مالومات ښيي چې ايراني جاسوسان د طالبانو مرستې ته د تیغو، بهرامچې او پشمیکه له لارو ځانونه رارسوي.

فراه د ايران له‌پاره په دې ورځو کې مهم ولايت دی، ځکه يو خو د ټاپي د ګازو د نل ليکې يوه برخه له دغه ولايت څخه تېرېږي، بل دا چې په دغه ولايت کې د بخش اباد د اوبو بند جوړېږي.
پر دې دواړو پروژو باندې کار، ايران خپل تدريجي مرګ بولي او په هر صورت چې وي هڅه کوي د دغو پروژو مخه ونيسي.

دا څه وخت وړاندې د ايران ولسمشر حسن روحاني په ښکاره چيغه کړه چې په افغانستان کې د اوبو د بندونو په جوړېدو دوی غلي نه شي پاتې کېدای.
تر هغه وروسته د ايران د پارلمان يوه غړي وويل، ايران بايد په افغانستان کې دننه خپل لاسپوڅي پر ملا وټکوي، خروړي يې کړي او ويې هڅوي چې حکومت او نظام ته ستونزې راولاړې کړي چې په دې توګه به د ده په خبره، حکومت پر ځان اخته شي او د اوبو بندونه جوړول به ورڅخه پاتې شي.

که څه هم ايران هر ځل له طالبانو سره پر خپل اچولي تار پرده غوړولې، طالب هم وخت ناوخته اعلاميه خپره کړې چې له ايران سره يې ګوتې نه دي پټې کړې، خو د ملا منصور وژل کېدل، د روحاني تر خبرو وروسته د تيورې خونړی سقوط، پر روغتون بريدونه، د وحشت انتها ته رسېدل، د کندهار په ښوراوک کې د اوبو زېرمه په بمونو الوځول، د شپانه د وزې هغه ګوډې پښې دي چې که څوک حال هم و نه وايي، دوی په واز کومې چيغې وهي او د ايران او طالبانو د نامشروع اړيکو کيسه کوي.

شنې په غلا نه چيچل کېږي او د روحاني تر بربنډو څرګندونو وروسته اوس ايران په ښکاره د شنو چيچلو ته غاښونه سپين کړي دي. دا چې طالب يې پر ځان نه راوړي، دا يې خپل کار او همېشنی عادت دی. طالب خو دا هم نه مني چې ای‌ایس‌ای يې په وسلو باروي، طالب خو دا هم نه مني چې د کوټې شورا په کوټه کې ده، طالب خو دا هم نه مني چې ګواکې د نيم ولس ژوند ته يې اور ورکړی دی. طالب نو څه مني چې دا ومني؟

حکومت بايد فراه توجه زياته کړي، پوله چې پرانيستې وي، دروازه چې خلاصه وي، د دېګ سر چې پورته وي، خامخا به هر سړی ګوله ورباندې پورې کوي.
حکومت دې نه يوازې په دغه ولايت کې له ايران سره پر شريکه پوله څار زيات کړي، بلکې تر دې ورهاخوا دې په دغه ولايت کې د قطري او نورو عربو پښو ته هم پام وکړي چې تر بړستن هاخوا وتلې دي.

هلته عرب هم په خپله ګټه پسې راغلي دي. وخت ناوخته شيخانو چهل‌تارونه راتړلي او پر فراه ورکښته شوي وي، نوم يې ورباندې د ښکار ايښی. هغوی د ايران پر ضد هلته فعاليت کوي، ځای نيسي او بيا په دې توګه خپلو موخو ته رسېږي.
که حکومت دغه ولايت ته جدي پام و نه کړي، د ټاپي او بخش اباد د بند جوړېدو خوبونه به د بخش اباد روانې اوبه يوسي.

سرخط ورځپاڼه