دلته د لسګونه پاکستاني اتباعو د دندو راز / جان اغا بهار

په همدې بانکي رشتو کې زه دا اوس هم تر سلو ډېر ځوان کادرونه پېژنم چې په خورا مشکلاتو کې یې تخصص کړی، انرژي یې مصرف کړې، لوږه ــ تنده یې ګاللې، یخنۍ او ګرمۍ ته یې نه دي کتلي، خو زده‌کړي یې کړې دي، اما بې‌دندې ګرځي.

همداسې سلګونه یې تاسې ممکن وپېژنئ چې په دې او دې ته ورته برخو کې یې زده‌کړې کړې دي، خو بې‌دندو ګرځي یا یې د سړک پر غاړه رېړۍ لګولې، تر ماښامه څو روپۍ ګټي چې هغه یې حد اقل کورنۍ اړتیاوې هم نه‌شي مرفوع کولای، ټوله ورځ یې ګردونه ووهي، وچې شونډې ولاړ وي… ماښام چې کور ته ولاړ شي، د ده رنګ او حالت ته په کتو یې ټوله کورنۍ یې ورسره ځورېږي یا ورته د کورنۍ غړي او خپل خپلوان د پېغور په ژبه وایي چې دومره تعلیم او تحصیل دې وکړ، خو بیا هم بې‌دندې ګرځې!

همدا رنګه په یو شمېر خصوصي پوهنتونونو کې دا اوس هم پاکستاني استادان تدریس کوي، په داسې حال کې چې په کور دننه ښه علمي او کادري ځوانان په پوهنتونو کې د استادۍ په ارمان دي چې له دې سپېڅلي ډګره خلکو ته خدمت وکړي، پوهه ووېشي.
ما او تا هم تر پرونه هڅه کوله چې په هغه حصوصي پوهنتون کې درس ووایو یا مو زوی، ورور درس ووایي چې بهرني استادان، په تېره بيا پاکستاني پکې د تدریس چارې مخې ته وړي.

پر دې خو پوهېږو چې په کور دننه زما و ستا ځوان له بې‌کاري او نهيلي دا اوس بهر ته پر مرګونو او ډاروونکو لارو قاچاقي تېرېږي، د کار و بار او یو څو پيسو ګټلو ته ځان رسوي، دلته ورته د هغې مزودرې د درېيمې برخې پيسو ګټلو کار پیدا شي چې کورنی ژوند یې ورسره روان شي، ایا بهر به ولاړ شي؟ د چا له مرګ سره بازګیري خوښیږي، څوک په ژوند کولو تنګ دی؟

ښکاره ده چې ځواب یې منفي دی. تاسې څه فکر کوئ چې پاکستانیان دلته یوازې د پيسو ګټلو له غمه مېشت دي، که نه د اذهانو د فاسدولو لهپاره هم کار کوي؟
زما و ستا محصل چې په هغه پوهنتون کې درس وایي چې پاکستانی پکې استاد دی، څومره به یې تر اغېز لاندې وي، څومره فاسدې فکري پېچکارۍ به ورته کوي، خبر ياست!؟
نه، نه او بیا هم نه، په تېره بيا په هغو پوهنځیو کې چې سیاست او ډیپلوماسي پکې لوستل کېږي؟

بغدادي پیر ناول تاسې و نه لوست، له کومو لارو چارو یې د تخریب او د ولس د اذهانو د خرابولو لهپاره کار اخيست!؟
عواقب یې بیا څه شوو، یو روغ نظام یې دړې وړې کړ، یو پوه او مدبر مسلمان پاچا یې ملحد را معرفي کړ، ما و تا بیا څه ورسره وکړل؟
دا پاکستاني استادان او په نورو مختلفو ادارو کې د کارکوونکيو په نامه مقرر کسان په اصل کې د خپل هېواد هغه سفارتخانو او کونسلګیرو ته ایجنټي کوي چې زموږ په هېواد کې په ډیپلوماټيکه بڼه فعالیت کوي.

سرخط ورځپاڼه