دا چوپتيا به دې نابود کړي

لکیوال:هلمند یاد

د افغان ټبر د قلم خاوندانو، سياستوالو، مشرانو، واکدارانو، اديبانو، فرهنگيانو، سپورتمېنانو، جهاديانو، ملايانو، د فېسوک اتلانو ، هنرمندانو او همداسې نورو او نورو صاحبانو:
تاسې گټه په چوپتيا کې ليدلې او يا مو اټکل کړئ. ځکه تاسې دا فکر کوئ چې که سبا دا لاريون (په اسلام اباد کې د پښتنو او بلوڅو لاريون) بې له کومې سترې لاس ته راوړنې پای ته ورسېږي نو بيا به شايد زما پوهه تر پوښتنې لاندې راشي، شايد ما خلک د ناشوناليشت او يا فاشيست په صفت ياد کړي، شايد زما شهرت، دنده او نور امکانات په خطر کې پرېوځي، شايد او شايد….خو داسې نه ده محترمه.

که خبرې کول مسؤليت لري نو نه خبرې کول هم مسوليت لري.

حقيقت دادی چې ستاسې چوپتيا ستاسې زړه ورتیا او پوهه تر پوښتنې لاندې راوړي. ايا ته تر ډاکټر اشرف غني په کوم صفت کې لوړ يې چې هغه نن د خپل موقف، شهرت او پوهې سره سره ددې لاريون نه خپله ننگه کوي او ته محترم لا چوپ يې.

ايا ته تر هغه پښتونه کومه بهتري لرې چې نن برېښنا، سرک، روغتون، ښوونځی، پوهنتون، ټليفون او همدې ته ورته د ژوند ټول امکاناتو سره سره راپورته کېږي او د لر او بر ناره پورته کوي او خپل او ستا حق غواړي مگر ته محترم لا چوپ يې.

که ته دا فکر کوی چې دا خو د پاکستان د پښتنو يا بلوڅو خوځښت دی او ما ته يې څه؟ يا دا چې دوي کله د افغانستان پر حالت خپله زړه خوږي ښکاره کړئ؟ يا دا چې کله هم ته په پاکستان کې اوسېدې نو تا سره به چېرې ظلم شوی وي. نو محترمه که ته لږ د ځان سره يو ځل بيا پدې خبرو فکر وکړئ نو دا ټول کارونه خو ستا د چوپتيا برکت دی. دا خو ټول زما او ستا د بې کفايتۍ نه سر چينه اخلي. که تا خپل تاريخ او جغرافيه لوستې وي، که تا د اوسنيو ناخوالو په اړه لږ هم سوچ کړی وي او د خپل راتلونکي نسلونو لپاره دې د ښه راتلونکي فکر په ذهن کې گرځي نو د وخت سره تگ زده کړه. له موقع گټه پورته کړه. دا ځکه چې ستا په شمول ستا د نسلونو نسلونو دښمن همدغه د ډيورنډ کرغېړنه کرښه ده، د پاکستان شتون دی او ستا په منځ کې زما او ستا په جامو کې پټ دښمن دی چې نن يې کم نه کم ته پر وړاندې د حق د غوښتلای نشې. مالي او ځاني قرباني خو لا څه چې کم نه کم د هغه چا پلوی هم نشې کولای چې نن يې ۹ ورځ ده چې ستا د دښمن په زړه اسلام اباد کې د خپلو خوېندو مېندو سره په کډه مخ ته ولاړ دی. نن يې ستا د دښمن په کور کې د هغه بېرغ ته اور پورته کړ او د لر او بر يو افغان ناره يې بدرگه کړه.

افرين شه د هغوي په زړه ورتيا او ستا پر چوپتيا