یو خبرداری، یوه محاسبه او یوه غوښتنه

یو خبرداری، یوه محاسبه او یوه غوښتنه
هرکله چې پر ټولنیزو – سیاسي ناخوالو څه ولیکم او یا هم د شعوري ودې سپارښتنه وکړم، نو سلګونه کسان راته ولیکي : 
– چاره څه ده؟
ـ دا وایه چې څه وکړو؟
ـ حللاره راوښيه ……
دا دی اوس په همدې لیکنه کې چاره، حللاره او د څه کولو چل درښیم. ستاسو د نیمايي ستونزو د حل کیلي په ګوتو درکوم او له هغې غمیزې ( تراژيدۍ ) د خلاصون چار در څرګندوم، چې که په هوښیارۍ، اراده او ویښ شعور دغه اسانه، ساده او بېړنۍ کړنه وکړئ، نو د ځانژغورنې لومړی ګام به مو پورته کړی وي .
#ټاکنې راروانې دي : دا ځل هغه چاته رایه مه ورکوئ، چې د کورني جنګ، په یوه نه یوه اړخ کې، جنګېدلی وي او خپل هېوادوال یې وژلي وي. چې موندلې پانګه یې د پوښتنې وړ وي، چې له ټوپک او تورې پانګې پرته بله وړتیا نه لري.
دا ځل داسې ځوان، ژمن، پاک او پر انسانمحوره فکر وعمل پسوللي نسل ته رایه ورکړئ، چې ستاسو برخلیک بدل کړای شي.
دا هم نه منم، چې ګواکې تاسو به د دې دواړو ډلو ترمنځ توپیر نه شئ کولای، ښه یې کړای شئ، ښه سم یې پېژنئ، خو یوازې باید د خپل ضمیر، ایمان او راتلونکي ښه ژوند غږ ته غوږ شئ. دومره تفکیک اوس خامخا کولای شئ ، چې (( څوک څوک دی ؟!))
او که دا ځل مو هم خپل ضمیر او ایمان وپلوره، بیا نو هيڅکله ماته ونه لیکئ، چې حللاره څه ده؟ دا وایه چې څه وکړو او ….