پر پاکستان دې نړیوال فشار زیات شي

اېمل پیاوړی

سره له دې چې هم افغانستان اسلامي هیواد دی، هم وسله وال طالبان د اسلام دعوه لري او هم قران کریم په سوله او پخلاینې ټنیګار کړی، مګر د دې ټولو باوجود وسله وال طالبان بیا هم د سولې پرځای بې موجبه او نامشروع جنګ ته ادامه ورکوي او هره ورځ زموږ بې ګناه هیوادوال شهیدانوي.

 د اسلام د مبین دین د ارشاداتو په رڼا کې باید مسلمانان په هر ځای کې د سولې او هوساینې د ټینګولو لپاره هلې ځلې وکړي. عدالت او قانون ته غاړه کېږدي او د نورې نړۍ لپاره مثال وګرځي، مګر د وسله والو طالبانو او ترهګرو ډلو له امله نن سبا اسلام او مسلمانان د ترهګرو په نوم شهرت لري، ځکه د دوی اعمال او کړنې په ظلم، وحشت او زور ولاړې دي.

د نړۍ پوهان هم د اسلام د مبارک دین د ارشاداتو په تائید سولې ته ارزښت ورکوي او ولسونه دېته هڅوي چې له یو بل سره په سوله کې ژوند وکړي.

Hellen keller  -1 هیلن کیلر یوه مشهوره امریکایي لیکواله وایي، سوله او ریښتینولي د شایستګی قیمت لري چې په لوړه سطحه زمونږ توجه جلبوي. دا سکالو زمونږ د ملت د اتحاد، اتفاق او امنیت څخه ښه ده. د پخلاینې پیغام مونږ ته د زړه خوشحالي پیدا کوي چې باید د دې الهی پیغام لپاره مبارزه وکړو او وایي چې د سولې په خپرولو او تبلیغ کې به زیاته هڅه وکړم.

2- Benjamin Jewett)) بنجامین جوټ د اکسفورډ د پوهنتون استاد او د افلاطون د کتاب ژباړن په (غیرتي ژوند) کتاب کې داسې لیکي د سولې ورځ په ورځ پراخوالی د بشر راتلونکي شاید سعادت او نیکبختی ته ورسوي.

د سولې خواږه چې چا څکلي وي نو د جنګ د نوم په اورېدو هم ټکان خوري، سوله هغه مرغه دی چې انسانان یې په خپله مینه، الفت او عاطفې خپلوي .  سوله د وګړو ترمنځ خواخوږي او ترحم زیاتوي، یو له بل سره د اړتیا پرمهال نور مرستې ته هڅوي او په سوله ییز چاپیریال کې انسان د نورو د لاس او ژبې له ضرره خوندي وي. 
د سولې په نعمت او اړتیا تر بل هر چا افغانان زیات پوهېږي، ځکه د تېرو څلورو لسیزو جګړو په افغانانو داسې بدې ورځې، پېښې او شیبې ولیدلې چې نور به یې حتی د اورېدلو تاب هم ونه لري. موږ ولیدل چې د جګړ ې له امله خلک بې کوره شول، کډوال شول، بدمرغه شول، ووژل شول، د کورنۍ غړي او خپلوان یې له لاسه ورکړل. د نورو له لوري وځورول شول، جایدادونه او شتمنۍ یې لوټ شوې. لنډه دا ډېرې او سختې نادودې یې ولیدلې.

له همدې امله افغانان هم د سولې په قدر پوهېږي ، هم اړتیا ورته لري او هم یې اساسي غوښتنه ده، خو درېغه چې طالب وسله وال او ګاونډی پاکستان لا هم رحم نه لري او لا هم له جګړې لاس نه اخلي او هره ورځ په ترهګریزو بریدونو، وحشتونو او جنایتونو لاس پورې کوي. په دې وروستیو کې چې د سولې نړیوالې هڅې پیل شوې دي نو د افغانانو هیله مندي هم زیاته شوې ده او باور دی چې پر پاکستان د نړیوال فشار له لارې به طالبان هم له جګړې لاس واخلي او سولې ته به راضي شي.