خلیلزاد: افغانان دې د ۴۰ کلنې جګړې ختمولو لپاره له اوسنیو فرصتونو استفاده وکړي

کابل (پژواک، ۸ سلواغه ۹۷) : د افغان سولې لپاره د امریکا ځانګړی استازی زلمی خلیلزاد وایي، د سولې لپاره اوس یو فرصت پیدا شوی او افغانان باید خپل سیاسي اختلافات یوې خواته کولو سره له دې فرصتونو څخه استفاده وکړي.

په کابل کې د امریکا سفارت له خوا د سلواغې په ۸ مه، پژواک خبري اژانس ته په رالېږل شوې خبرپاڼه کې راغلي چې زلمي خلیلزاد دا څرګندونې نن د افغانستان د رسنیو له استازو سره د ځانګړې لیدنې پر مهال کړې دي.

هغه زیاته کړې، په قطر کې یې دا ځل له طالبانو سره ځانګړې لیدنې لرلې، چې له پخوانیو سره یې توپیر درلود او تر هغو پخوانيو لیدنو ډېر ښه وو.

خلیلزاد ویلي، د دې لیدنو پر مهال پر څو مهمو موضوعاتو پرمختګونه وشول او په پرنسیپ کې پر دوو مهمو موضوعاتو موافقه هم وشوه.

خو د امریکا دغه استازي زیاته کړې، له دې مخکې چې په خپلو هڅو کې کومې بریا ته ورسیږي، باید نور کار وکړي.

خلیلزاده وایي: ((زه باوري یم او ویلی شم، چې د لومړي ځل لپاره له طالبانو سره خبرو کې مهم پرمختګونه شوي دي.))

د هغه په وینا، اوس یو فرصت پیدا شوی او افغانان باید له دې فرصتونو څخه استفاده وکړي، خپل سیاسي اختلافات یوې خواته کړي او په بیړې سره له دې فرصتونو سره مثبته معامله وکړي.

دی وایي، اوس باید په افغانستان کې د نورو تراژیدیو مخه ونیول شي او دا ۴۰ کلنه شخړه نور په ښه توګه پای ته ورسول شي.

د امریکا ځانګړي استازي خلیلزاد د بین الافغاني مذاکراتو په اړه ویلي، د قطر په ناستو کې یې طالبان وهڅول چې له افغان حکومت سره مستقيمو خبرو ته کېني او دا د امریکا د تګلارې برخه هم ده.

د هغه په وینا، همدا خبره یې د افغان دولت چارواکو سره هم کړې ده، چې دی بین الافغاني مذاکرات غواړي او افغانان باید د بین الافغاني مذاکراتو ته یوه لاره پیدا کړي.

ده زیاته کړې: ((د افغان شخړې هواری په خپله د افغانانو په لاس کې دى.))

خلیزاد وایي، دا يوه ناسمه خبره خپره شوې چې افغانان له دې پروسې یوې ډډې ته ساتل شوي دي، دا خبره سمه نه ده، د افغانان غږ هر چېرته ځای لرلی.

د هغه په خبره، د دوی لپاره لویه اندېښنه افغان ځواکونه او ثبات ده، په دې برخه کې د افغانانو اندېښنې هم د منلو وړ دي.

ده زیاته کړې، دوی د یوه هر اړخیزه اوربند لپاره کار کوي، په دې برخه کې له افغان حکومت او نړیوالو همکارانو سره په اړیکو کې دي چې د دې هدفونو لپاره پر یوه میکانیزم هوکړې ته ورسیږي.

د موقت حکومت په اړه زلمي خلیلزاد ویلي، په دې اړه یې له طالبانو سره هیڅ ډول خبرې نه دي کړي.

ده زیاته کړې: ((موږ د افغانانو لپاره په بیړه کې یو څو چې روانه جګړه او تاوتریخوالي څومره چې ژر کېږي، ختم شي، خو موږ حالات ګډوډ پرېښودل هم نه غواړو. خو دا روانه پروسه به بشپړوو.))

د یادونې وړ ده، چې د سولې د روانو هڅو په اړه ولسمشر غني نن ولس ته په خپله وینا کې وویل، چې دوی هم د بیړې سوله غواړي، خو په تدبیر سره.

هغه د پخواني ولسمشر ډاکټر نجیب الله یادونه وکړه، چې ملګرو ملتونو ورسره ژمنه کړې وه، خو بیا يې سمه ساتنه ونه کړه او ووژل شو.