مختلف خواړه مو له ډاکټره را ګرځوي

مېوې ګټور او قوي غذايي مواد لري، همدارنګه سابه لکه پالک، براکولي، روميان، او الوګان مه هېروئ.

پروټين لرونکي بې‌غوړيو خواړه وخورئ

د خوسي «سخوندر» د ورانه غوښه، چرګ، فيل مرغ، لوبیا، هګۍ، په خپل لوښي کې ولرئ او ماهی په اوونۍ کې دوه ځله وخورئ.

غلې دانې پوره استعمال کړئ

غلې دانې نيمه برخه باید داسې وي چې تصفيه شوې نه وي، لکه سبوس لرونکي اوړه او په اصلي حالت کې وريجې چې زیات غذايي الیاف لري.

لبنيات مه هېروئ

شيدې، مستې او له شيدو نور جوړ شوي محلولونه په خپل دسترخوان ولرئ، خو هڅه وکړئ چې غوړي يې کم وي، په دې صورت کې پوره اندازه کلسيوم او نور اړين غذايي مواد ولري.

اضافي غوړي لرې کړئ

زیات غوړ خواړه لکه په خپله غوړي، شورواګانې، کبابونه که څه هم د زياتې انرژي لرونکي دي، خو لومړۍ لويه ناروغې چاغښت ترې پيدا کېږي؛ نو د دې غوړو خوراکونو بديل دا دی چې د ترکارې شوروا، د ليږ غوړيو سوپ او پنير وخورئ چې د زړه له ناروغې، د وينې فشار او له چاغښته خلاص شئ.

ورو ورو خوراک کوئ

خواړه ژر ژر مه خورئ، په غاښونو يې ډېر ميده کړئ، معدې ته د غاښونو کار مه پرېږدئ، په بېړه خوراک د ډېر خوړو چانس زياتوي هوا مو له غذا سره معدې ته ننباسي چې په کولمو کې باد توليدوي.

کوچيني لوښي وټاکئ

د کم خوراک د عادت لپاره په نړۍ کې بله لويه حل‌لاره نه وه، په پای کې ځينو چاغو کسانو د ځان لپاره واړه لوښي انتخاب کړل چې دې کار يې ورو ورو غذايي رژيم کم کړ، ځکه غټ لوښي د دې سبب ګرځي يو کس مجبورولای شي چې ټول خواړه وخوري.

خوراک مو کنټرول کړئ

دا هڅه وکړئ چې خوراک په کور کې وکړئ تر څو دا درک درته مالوم شي چې څه شی او څومره وخورئ، خو که د اړتيا له مخې بهر ډوډۍ ته کېناستئ د سره کړيو پر ځای جوش کړي خواړه وخورئ.

نوي خواړه وازمايئ

په ورځني غذايي مهالوېش کې مختلف خواړه وټاکئ، ځکه ټول خواړه چې الله «ج» پيدا کړي دي د انسان لپاره مهم او بېلابېل خوندونه او وېټامن لري؛ نو هڅه وکړئ نوې نوې مېوې او سلادونه وخورئ.

طبېعي خواړه خورئ

هغه شيان وخورئ چې طبېعي وي، لکه تازه مېوې، شات، د مېوو او مستو سلاد، د مڼو او او بهي مربا او دې ته ورته نور خواړه.