طالب دې يې ځواب کړي/ روښان

دا لومړى ځل نه دى چې وسله وال طالبان په خپلو ترهګريزو اعمالو پر افغانانو توره وريځ خوروي او ژوند يې تياره کوي، بلکې هرکله چې د افغانستان د پرمختګ او ترقۍ ضد هغه ګاونډي او سيمه ييز هېوادونه چې د دوى ملاتړي دي دوى ته کوم دستور ورکړي نو دوى هم پرته له کوم درک او فکره هغه دستورونه عملي کوي

. يو له دغو دستورونو هېواد ته د وارداتي برېښنا د ستنو يا پايو ړنګول او د مزو پرې کول دي، طالبانو په خپل دې غير انساني کار سره د خلکو کورونه تياره کړل، د فابریکو او کارخانو فعالیتونه يې په ټپه ودرول، چې په کې زرګونه کسان د يوې مړۍ حلالې روزۍ ګټلو لپاره بوخت وو، هغه روغتيايې خدمتونه چې د برېښنا په وسيله ترسره کېږي له خنډونو سره مخ شول او همداسې ډېرې ستونزې يې خلکو پېښې کړې، طالبان دا ډول تخريبي اعمال د دې لپاره ترسره کوي تر څو خلک نور په تنګ راشي او له‌ خپل ژوند څخه ناراضه شي.

د يوه عادي افغان په توګه د طالبانو له تحريک او ددوی له ډلو څخه يوه پوښتنه لرم او هغه دا چې کله تاسې په هېوادکې له بهرنيو ځواکونو سره مخالف یاست او همدرنګه دولت هم د ځان لوی دښمن بولۍ نو بيا ملت او دا ولسونه ستاسې څه کېږي څوک په عادي توګه خپل ژوند مخته وړي.
که چېرې تاسې وايي چې د افغانستان په جغرافيه کې اوسېدونکي وګړي او افغان ولسونه ستاسې ولسونه او ستاسې د هېواد بچيان دي نو بيا ولې له هغوی څخه رڼا اخلۍ او ژوند يې تيارو ته ورټېل وهئ، که چېرې تاسې د پرديو غلامان نه یاست او پردیو ډول ته نه ګډېږۍ نوولې د برېښنا مزي پرې کوئ له دې خو ټول افغان وګړي استفاده کوي يواځې حکومت خو يې نه استفاده کوي،له دې هرڅه څخه ستاسې هدف څه دی؟