طالبان له دوه ادرسونو د سولې خبرې کوي

د طالبانو د ملا هیبت الله ډله په قطر کې له امریکا سره د سولې په تړاو له خبرو ناخبره وه او له همدې کبله یې د قطر ډلې سره مخالفت راپورته شوی او ملا برادر یې په معامله ګرۍ تورن کړی دی.

تېر ورځ (جمعه) د ملا هیبت الله په مشرۍ د طالبانو یوه ډله د اماراتو په ابوظبۍ ښار کې د افغان حکومت له استازو سره د سولې په تړاو ناسته وکړه.

د ملا هیبت الله ډله چې د کویټي شورا او د زیات شمېر ولایتونو قومندان پکې شامل دي، قطر کې له امریکا سره خبرو کې حاشیه کې ساتل شوي و، او هیڅ ډول جزیات ورسره د قطر دفتر نه دي شریک کړي.

کله چې د ملا هیبت الله ډله پوه شوه چې له امریکا سره خبرې کیږي او جنګي طالبان او د کویټې شورا په جریان کې نه ده، همغه و چې د کابل شش درک کې یې پر امریکایانو برید وکړ او دا خبرې یې لغوه کړې.

پر امریکایانو د ملا هیبت الله ډلې برید د قطر دفتر له سختو نیوکو سره مخ شو او طالب مشرانو یو بل ته سپکې او بد رد ویلي دي، همغه و چې دا ډله په دوه مسیرونو لاړه، ملا برادر ډله له امریکا او د ملا هیبت الله ډله غواړي له افغان حکومت سره خبرې وکړي.

پاکستان او قطر د ملا برادر ملاتړ کوي، او له همدې کبله ویره لري چې سعودي او متحده عربي امارات له ملا هیبت الله سره اړیکې لري او هڅه به وکړي چې د افغان حکومت او طالبانو ترمنځ منځګړتوب وکړي.

نو د دې لپاره چې د طالبانو ډله د پاکستان او قطر له انحصار و نه وځي، هڅه دا ده چې ملا برادر ډله د سولې سرلارې پریکړه کوونکي وبولي، خو کویټې شورا او جنګي قومندانان له قطر ډلې سره مخالف دي، لامل دا دی چې د قطر ډله هیچا سره مشوره نه کوي، خپله تصمیم نیسي او نورې ډلې هیڅ ډول تصمیم نیونکي نه بولي.

اسلام اباد ته د طالبانو سفر د همدې لپاره برابر شوی و، خلیلزاد او پاکستان په دې کې منځګړتوب کوي، چې دا ډلې سره یو کړي، تاسو ولیدل چې د اسلام اباد له سفر وروسته د طالبانو پلاوی کویټه پښور او ایبټ اباد کې پاتې شول، تر څو خپلمنځي خبرې وکړي او دا ډله له پآشل کیدو وژغوري.

کویټه کې د طالبانو د مشرانو پاتې کیدو یو لامل دا و چې که ملا هیبت الله مخالفت کوي او د قطر له دفتر سره پر لار نه ځي، نو طالب مشران او لوړپوړي چارواکي به له ملا برادر سره بیعت وکړي او ملا هیبت الله به عزل کړي.

خو د جګړې قومندانان بیا ملا برادر سره جوړ نه راځي او د ملا هیبت الله په مشرۍ باندې ټینګار لري، لامل دا دی چې ملا هیبت الله ټولو جنګي قومندانانو ته پيغام لیږلی چې د قطر دفتر د طالبانو په ټولې ډلې باندې امریکا سره معامله کوي.

اوس د دې لپاره چې ملا هیبت الله د سولې په خبرو کې حاشیه کې پاتې نه شي، ملا هیبت الله له افغان حکومت سره مخامخ خبرو لومړنۍ ناسته د جمعې په ورځ د اکتوبر په ۸مه نیټه وکړه.

دا ناسته د باور جوړونې لپاره وه او دوام به پيداکړي چې څنګه کیدلی شي افغان حکومت او طالبان یوې هوکړې ته ورسیږي.