ټکنالوژي څه ډول زموږ په ورځني ژوند کې اسانتیاوې رامنځته کوي؟

ټکنالوژي ورځ تر بلې د پرمختګ په حال کې ده او دا چې د انسان ټولنیز ژوند ورسره تړلی دی، نو معلومه ده چې اسانتیاوې هم رامنځته کوي.

کله مو فکر کړی چې ډېر لرې نه همدا څو کاله وړاندې او ښایي د افغانستان په ځینو کلیو کې اوس هم د ژوند پرمخ وړو لپاره هماغه پخوانۍ طریقې کارېږي، خو هغه رامنځته شوې ټکنالوژۍ او ترې استفادې زموږ ژوند څومره اسانه کړی دی؟

 مخابراتي اړیکې:

همدا څـو کاله وړاندې به خپلوانو ته د زنګ وهلو لپاره خلک پاکستان او ایران ته تلل او په ګاونډیو هېوادونو کې خپلو دوستانو ته به یې لیکونه استول. نن په افغانستان کې نږدې هر کس یو موبایل لري او مخابراتي اړیکې خورا اسانه او ارزانه شوې دي.

ځمکه قُلبه کول:

د ځمکې د قُلبه کولو لپاره به خلکو غوایان ساتل او روزل، مګر اوس د ټکنالوژۍ په مرسته ټیکټر موټر په اسانه، ارزانه او کم وخت کې دغه کار ترسره کوي. د کرنې د میکانیزه کولو لپاره پریمانه نور وسایل او تجهیزات کارېږي او په دې ټولو کې د ټکنالوژۍ لوی لاس دی.

زده کړې:

نن سبا د افغانستان په ادارو کې په کمپیوټر څخه استفاده، انټرنېټ او په تعلیمي مرکزونو کې د انټرنېټ په مرسته له لرې ځایه د زده کړو زمینه برابرېدل، هغه اسانتیاوې چې افغانستان یې یوازې په څو کلونو کې له شلمې پېړۍ څخه یوویشتمې پېړۍ راوست.

بانکوالي:

په افغانستان کې د بانکونو او بانکولۍ تر عامېدو وړاندې به خلکو په نغدو پیسو معاملې کولې او دې کار له یوې خوا زیات وخت نیوه او له بلې خوا اقتصادي زیانونه یې هم لرل، مګر تر ۲۰۰۱ کال وروسته په افغانستان کې د بانکوالۍ په عامېدو سره مو کله فکر کړی چې په دې برخه کې څومره اسانتیاوې رامنځته شوې دي؟ اوس څلورویشت ساعته کولی شئ له ماشین څخه نغدې پیسې واخلئ او د زړېدو او غلا کېدو وېره یې هم نه وي.

ترانسپورټ:

پخوا به خلک په خرو، قچرو، اسونو او یو څه وخت وروسته ملي بسونو او لویو موټرو کې له یوه ځای څخه بل ته تلل، مګر د ټکنالوژۍ په پرمختګ سره اوس خلک په کوچنیو چټکو موټرو او الوتکو کې له یوه ښار او هېواد څخه بل ښار او هېواد ته تللی شي او د ټکنالوژۍ پر مټ ډېرې اسانتیاوې رامنځته شوې دي.

پایله:

برېښنا د زېربناوو زېربنا ده او په افغانستان کې د ټکنالوژۍ په عامېدو کې یې ډېره زیاته مرسته کړې ده، مګر لا هم په دې برخه کې افغانستان ان د هغو ګاونډیو هېوادونو سیال هم نه دی. که تاسو فکر کړی وي، په پورته هره برخه کې افغانستان یو اوږد واټن وهلی او پریمانه ثبوتونه شته چې ټکنالوژۍ د خلکو د ژوند په ښه کېدو کې مهم او لومړی رول لوبولی دی.