طالبان خلک په غلطو خوبونو ډاروي

د بدخشان کیسه ده چې تازه د ملا غلام حقجو په نوم د طالبانو یو ځایي قومندان چې تقریبا ۶۰ کاله عمر لري، په سیمه کې یې یوه نجلۍ خوښه شوې وه.

ملا حقجو خپله ورځي او نجلۍ پلار ته کیني چې لور یې د ده په نکاح کې ورکړي، خو د نجلۍ پلار انکار کوي.

لامل دا و چې نجلۍ پيغله د لږ عمر او سړی له زوره لویدلی د شپیته کالو و چې نجلۍ سره هیڅ نه جوړیده.

خو د طالبانو دا قومندان چې جنسي غریضې په سر اخیستی و، هیڅکله یې له نجلۍ لاس نه اخیست چې تر څو یې په نکاح کړي نه وي.

ملا حقجو څو ځل د نجلۍ پلار ته کیني چې لور یې ورکړي، خو د نجلۍ پلار انکار کوي، ملا حقجو د کلي ملا څخه په دې برخه کې مرسته غواړي چې دا ښکلې نجلۍ د ده په نکاح کې ورته وکړي.

د کلي ملا په رضا او په فشار باندې اړ کیږي چې د نجلۍ پلار سره خبرې وکړي چې لور یې د دې طالب قومندان په نکاح کې ورکړي، خو بیا هم د رد ځواب ترلاسه کوي.

د طالبانو قومندان ملا ته وایي چې د نجلۍ پلار ته ووايي چې طالب قومندان ملا حقجو داسې خوب لیدلی چې د نجلۍ کورنۍ باندې لوی مصیبت راځي او که دا لور نذر کې ورکړي، دا مصیبت به ترې لیرې شي.

د نجلۍ کلیوال او ساده پلار چې د خوب تعبیر اوري، راضي کیږي چې خپله لور د ۶۰ کلن سړي په نکاح کې ورکړي.

دا کیسه مې دلته د دې لپاره وکړه چې تاسو وګورئ، طالبان له څومره کاذبو تبلیغاتو او خرافاتو کار اخلي، ساده باایمانه خلک ډاروي، تیرباسي او بیا ترې خپلې ګټې پوره کوي.

دا یو مثال دی چې لکه د بغدادي پير د طالبانو یو قومندان د یوې کورنۍ لپاره د دین دام جوړوي او خپلې ګټې ترې ترلاسه کوي.

داسې زرګونه مثالونه شته چې د طالبانو قومندانان د ځایي ملایانو په واسطه باندې خلک په دین باندې ډاروي او تیر باسي یې چې خپله ګټه ترې پورته کړي.

طالبانو دغه ډول د جګړې لپاره ځوانان هم جذب کړي دي، جعلي او د درغو خوبونه یې ورته ویلي، یو داسې تعبیر یې ورته کړی دی چې د خلکو زړه لاس ته راوړي، و یې ډار کړي، او د خپلو موخو لپاره یې وکاروي.

طالبان په دې پلمه خلک جګړې ته استخدام کوي، د درغو خوبونه ورته وایي، ناسم تعبیرونه ورته کوي، ځوانانو ته وایي چې تاسو مو جنت کې ولیدئ، تاسو مو دوزخ کې ولیدئ او که دا کار وکړئ، نو جنتیان به شئ او که یې و نه کړئ، دوزخیان به شې