روژه والې لنډۍ، څوارلسمه برخه

ښېرې به یې ولې نه قبلېږې

یار په معصومه خوله روژې نیولې دینه

صبر کوه، صبر مې کړی

روژه تېرېږي بیا به وکړو دیدنونه

غرق شې آذان را باندې وشو

 حقه روژه ده ګنهګار به شو مینه

فرضي روژه ده غلی کښېنه

چې اختر راشي بیا دې هره یوه منمه

فرضي روژه مې ده نیولې

په رمضان کې معافي غواړم مینه

فرضي روژې ته خوشحالېږم

ستا د دیدن روژه کې مړه تبه لرمه

قاري به ولې خوښي نه کړي

چې د روژې ختمانه جیب ته اچوینه

ملا تراوېح دې کړه را لنډې

سخته ګرمي ده ستړی شوی یم مینه

قاري د خدای روی مې دروی

د تراوېح تلاوت سم کوه مینه

قرآن روژه کې نازل شوی

د قدر شپه پرې ګواهي وایي مینه

کمکي جانان روژه نیولې

په روژه ماتي به یې ښه ونازومه

که په روژه کې جانان راشي

روژه به و خورم جانان نه خپه کومه

که په روژه کې مې یار راغی

روژه به پرېږدم ګران به نه خپه کومه

که ته مین په رمضان شوې

خدای به جنت په بدله کې درکوینه

که ثواب غواړې دیدن مه کړه

د روژې میاشت ده دیدن ډېر څه ورانوینه

که چا ویل چې جانان راغی

په خوله روژه به په غرمه کې ماته کړمه

که چا ویل چې روژه راغله

په دغه زېري به حاصل کړي ثوابونه

که چا ویل چې نن ماښام شو

زه به خرما په روژه ماتي ورکومه

که خدای کول جنت به مومم

ما ته روژې د شفاعت ویلي دینه

که د روژې آزار قبلېږي

په روژه ماتي ښېرې کړم تا غرقومه

که د روژې په غرمه راغلې

زه به درووزم وچې شونډې، تش لاسونه

که د روژې په غرمه راغی

روژه به و خورم، ګران به نه خپه کومه

که دیدن غواړې سبا راشه

روژه را درومي بیا به نه وي دیدنونه

که دیدن کړې بیړه راوکړه

سبا روژه ده یاره نشته دیدنونه

که سروکال ټوله روژه وای

زما د یار دیدن به نه وو په عمرونه

که بیا مې سل کاله روژه شي

یو پړشمی خدایه د یار په شونډو کړمه

که نصیبونه په رښتیا وي

زموږ نصیب کې یې روژې لیکلې دینه

ګران د روژې په ماښام راغی

له پیرکي سره یو ځای ور ووتمه

لالی مې کلک په خوب ویده دی

د پړشمي ملانو وکړل اذانونه

د (روژه والې لنډۍ) د سلسلې پنځلسمه برخه به ژر خپره شي له موږ سره اوسئ. هیله ده چې ګل آغا احمدي پخپلو دعاګانو کې یاد کړئ. مننه