د ماتې شوې کړکۍ نظریه

یوه خرابه شوې ودانۍ تصور کړئ، چې د کړکۍ ښیښه یې ماته وي. که ژر و نه رغول شي؛ نو لارویان ګومان کوي، چې هېڅوک ددې ودانۍ په کیسه کې نه دي او نه یې هم څوک څاري. ورو – ورو یې تخریب پیلېږي او که دا حالت لږ نور دوام ومومي؛ نو په کور کې به روږدي کسان او یا هم ځناور دېره شي او په یوه کنډواله به بدل شي.
دا د يوې مشهورې ارواهنیزې نظريې (ماتې شوې کړکۍ) لنډیز دی. ددې نظریې اساس دا دی، چې هره ستونزه او ننګونه باید ژر تر ژره حل شي؛ په دې توګه به هم کمه انرژي مصرف شي او هم به د ډېر تخریب مخه ونېول شي.
ددې نظریې خاوندان زیاتوي، که تاسو هره ورځ د کاغذ یوه خرابه شوې پاڼه پر مېز پرېږدئ، په میاشت کې دننه دننه به ستاسو کاري میز به په کثافت دانۍ بدل شي. که ستاسو د موټر یوه عادي پرزه خرابه شي او پر وخت یې جوړه نه کړئ؛ نو درې کاله وخت لګي چې تاسو مطلق بې موټره شئ. که نن لس دقیقې وخت بې ځایه تېروئ، وروسته به ساعتونه ساعتونه هم بې ځایه کوئ او په دې توګه به ورو ورو خپل ټول ژوند بې ګټې تېر کړئ.
که د خپل ژوند ماتې شوې کړکۍ ومومئ او ژر تر ژره یې ترمیم کړئ؛ نو ژوند به مو په چټکۍ سره ښه شي.
ستاسو د کار او ژوند ماتې ښیښې چرته دي!؟ آیا تر اوسه مو ورته فکر کړی؟