دا یو متر ځای د جومات محراب دی چې پنجاب اشغال کړی دی/ خوشال خلیل

وايي ډاکټر نجیب ته چا ویل کنړ او خوست یې ونیو، اوس به څه کېږي، هغه وویل که ټول هېواد هم ونیسي بیا به یې ترلاسه کړو، خو زما اندېښنه دا ده چې هغوی زموږ نه ډېر مهم یو متر ځای نیولی که هغه ترلاسه نه کړو، دا مرګ ژوبلې نه ختمېږي. ویل دا یو متر ځای د جومات محراب دی چې پنجاب اشغال کړی دی.
نننۍ چاودنه ډېره دردونکې او غملړلې وه، پنجاب له همدغه یو متر ځای نه په استفادې د تېر په څیر د کابل نننی برید هم ترسره کړ، د بمونو راوړونکی موټر، هغه کې سپاره، او لارښود یې چې افغان نه وي په موږ دا لوبه نشي کولی. د نن ورځې جنایت کارانو په یو نه یو ډول له دغه یو متر ځای څخه مشروعیت اخیستی دی او خپل دغه عمل ته جهاد وايي. اوس تازه یو نیم ملا چې پوه شوي دي او له دغه یو متر ځای څخه د پنجاب په ضد غږ پورته کوي هغه په بې رحمۍ وژل کېږي، دا ځکه چې دښمن پوهیږي چې ددغه یو متر ځای له لاسه ورکول ورته څومره ارزښت لري.
له بده مرغه له دومره ناخوالو سره سره بیا هم زموږ د زیاتو ملایانو فکرونه خپل نه دي او زموږ زیات خلک طالب فکره او په یو ډول هغوی ته تمایل لري، تر هغو چې دا فکرونه جوړ نشي او د کور دننه دښمن ونه پيژنو او په وړاندې يې کلک دریځ اختیار نه کړو، دا برید او خونړۍ پېښه به وروستۍ نه وي.