پاکستان د افغان دښمنۍ لوړه بیه پرې کوي/محمد ودان روښان

څلوېښت کاله کېږي چې پاکستان موږ ته په خوږو او خوړو کې زهر راکوي، خو موږ یې دومره ګنګس کړي یوو چې دغه حالت نشو درک کولی او یا یې دومره وېرولي یوو چې له وېرې خپل د اعتراض غږ نشو پورته کولی، ځکه نو په تېر کې پاکستان ورځ تر بلې د افغانستان پر وړاندې خپله دښمني سخته او ډاګیزه کړه.

مګر بیا هم چا دا جرئت ونشو کړای چې پاکستان ته ووایي ولې یې د افغانستان پر وړاندې دغسې له بدۍ، بدبینۍ او دښمنۍ ډک دریځ اختیار کړی او هره ورځ د افغانستان د بربادۍ او د افغان ولس د بدمرغه کولو دسیسې جوړوي.

ولسمشر غني واک ته له رسېدو سره سم د افغانستان پر وړاندې د پاکستان دریځ او موقف په وضاحت او جرئت تعریف کړ. هغه په ډاګه وویل چې پاکستان له تېرو څلوېښتو کالو راهیسې له افغانستان سره په نا اعلان شوې جګړه اخته دی. نوموړي د دغه اعلان ترڅنګ په ټینګار سره پاکستان ته خبرداری ورکړ چې که د افغانستان پر ضد خپله نااعلان شوې جګړه ونه دروي، نو افغانستان به هم په بالمثل عمل لاس پورې کړي.

ولسمشر غني په افغانستان کې د امنیت او ثبات تامین په دوه جلا بعدونو ووېشه یو له پاکستان سره د دولت په دولت د مذاکراتو او دویم له پاکستان سره د بین الافغاني مذاکراتو بعد. نوموړي له پاکستان سره سولې ته لومړیتوب ورکړ او ورته وې ویل: چې پاکستان دې له موږ سره د دولت په دولت له لارې د سولې او هر اړخیز مذاکرات وکړي.

جمهور رئیس غني دا هم وویل چې د پاکستان او افغانستان نېک مناسبات د سیمې د ثبات او په خپله د پاکستان لپاره زیات ګټور دي، ځکه چې پاکستان دا مهال د انرژۍ له قلت سره مخ دی او له بلې خوا خپلو صادراتو ته مناسب بازار لټوي، د پاکستان دغه دواړه اړتیاوې د افغانستان له لارې پوره کېږي، ځکه چې پاکستان مجبوره دی خپلې اړتیاوې د منځنۍ اسیا له انرژۍ څخه پوره کړي او همدارنګه منځنۍ اسیا د دوی د صادراتو لپاره غوره بازار او مارکېټ دی او د دغو دواړو لپاره د افغانستان موقعیت د دوی لاره ده.

پاکستان هغه مهال کولی شي چې هم خپلې اړتیاوې پوره کړي او هم خپل صادرات وپلوري چې له افغانستان سره اړیکې او دوستانه مناسبات ولري او همدارنګه د ترهګرو او ورانکارو ډلو له ساتلو او تمویل څخه لاس واخلي.

که چېرې پاکستان د افغانستان پر موقعیت فکر ونه کړي او خپل چلند بدل نه کړي، نو باور دی چې پاکستان به تاوان وکړي او له افغانستان سره د پاکستان اوسنۍ دښمني به په لوړه بیه تمامه شي، ځکه چې یو خو به یې د صادراتو مخه ډب شي، بل به خپلې اړتیاوې په اسانه او ارزانه پوره نشي کړای او تر ټولو مهمه دا چې افغانستان به د پاکستان پر ضد په نړیواله کچه خپلې هڅې جاري وساتي او د دی ډېر پخواني او ستراتیژیک ملګري به د پاکستان د اوسني چلند او له ترهګرۍ سره د اړیکو پالنې له امله پر هغه شکمن او دېته اړ کړي چې له پاکستان سره خپلې اړیکې وځنډوي او دا به د افغان دښمنۍ لپاره دپاکستان تر ټولو لوړه بیه وي چې پرې کوي یې.