الکترونیکي تذکرې دې نور د بسوګۍ واده نه شي

هغه ستونزه هم حل شوه، ارګ اعلان وکړ چې په تذکره کې به د افغانستان د ټولو قومونو نومونه ليکل کېږي، خو دې اعلان غم جوړ کړ.
ځکه ځينو د ځينو قومونو پر حق خېټه اچولې وه، غوښتل يې هغوی هم د ځان په ډله کې تېر کړي، خو اوس چې د هر قوم نوم ليکل کېږي، د دوی برخه بيا خواره شوه او اوس چيغې وهي چې نه، قوم بايد نه وي ليکل شوی.
دا خلک ملنډې وهې؟
چې د قوم يادونه نه غواړې، نو بيا دې ولې لومړی وار چيغې وهلې، لاريونونه او ګواښونه دې کول چې بايد خامخا په تذکره کې د قوم نوم وي، يو کال دې دغه مهمه پروسه په همدې پوچو غوښتنو وځنډوله، که يې هغه وخت له زړه د قوم يادول نه غوښتل، نو اوس خو بايد غلي کښيني او که يې هغه وخت له زړه غوښتل؛ نو اوس بد کوي چې پورته پورته غورځي.

برېښنايي تذکرې د افغانستان له‌پاره په اوسنيو حالاتو کې تر حد زيات مهمې دي او ځنډول يې له دې خاورې او ولس سره خيانت دی.
که دغه تذکرې ووېشل شي، د افغانستان دقيق نفوس مالومېږي، د قومونو شمېر، د هغوی ژوند، اړتياوې او نور بيا دومره نه جنجالي کېږي، لکه اوس چې دي.
که دغه تذکرې ووېشل شي، د افغانستان د هر انسان بشپړ مالومات به پوره پکې خوندي وي، پردي خلک به نه‌شي کولای چې د اوسنيو کاغذي پرپړو غوندې تذکرې په اساني جوړې کړای شي، خپل او پردی به مالوم شي، غل به نه ورکېږي، جنايت‌کار به په اسانۍ تر ګرېوان نيول کېږي.
د دغو نويو تذکرو په وېش سره به د فساد کچه بېخي راټيټه شي او افغانستان به د عصريتوب، ټيکنالوجي او کمپيوټر پر لور يو بل ګام پورته کړي.
په دې سربېره، پرېمانه ګټې دي چې د نويو برېښنايي تذکرو په وېش سره، خاورې، ولس او نظام ته رسېږي.

د دومره سترو ګټو ځنډول، هغه هم د يوې کوچنۍ سيمې او څو مغرضو کسانو د فرمايشونو له‌پاره بدترين او لوی خيانت دی.
د دې پر ځای چې د دغو تذکرو وېش وځنډول شي، لا بايد هڅې وشي چې په ښه توګه د هېواد تر لېرې پرتو سيمو پورې خلکو ته ورسول شي.
موږ په مخ کې ټاکنې لرو، که دغه تذکرې توزيع شي، په ټاکنو کې د پراخو درغليو مخه نيول کېدای شي.
اوس بايد ټولې هڅې پر دې وشي چې څنګه د دغو تذکرو اړوند مواد خوندي کړل شي، څنګه د ملي يووالي د لا ټينګولو په برخه کې ورڅخه ګټه واخيستل شي او څنګه ژر تر ژره په ښه توګه تر خلکو پورې ورسول شي.
که په دغه برخه کې څوک ووړ خيانت هم کوي، راتلونکي نسلونه به يې پر قبرونو ناړې توکي.

سرخط ورځپاڼه