د ملت عظمت ته د جنرال حبیب سپکاوی

اېمل پیاوړی

جنرال حبیب احمدزی چې د ولسي جرګې په ټاکنو کې یې ماتې خوړلې او عقده یي شوی دی، نو د غچ اخیستنې په موخه یې نه یوازې غیر مسوولانه څرګندونې وکړې، بلکې د افغانستان د عظیم ملت عظمت ته چې هغه ارګ یا ولسمشرۍ ماڼۍ دی ، نهایت لوی توهین او سپکاوی وکړ.

نوموړي له خورشید تلویزیون سره په مرکه کې تور پورې کړی دی چې ګواکې په مقرریو کې له ښځو څخه جنسي رشوت اخیستل کېږي او د جنسي معاملې په بدل کې پر دندو ګومارل کېږي، نوموړي همدارنګه د نویو بریالیو شویو ښځینه وکیلانو په اړه هم دغه ډول تهمتونه پورې کړي او حتی ویلي یې دي چې د نوماندانو نوملړ ولسمشر غني ته ور وړل شوی او هغه په کې ځینې ص صحیح یانې بریالي کړي او هغوی یې چې چلیپا کړي دي نو ناکام شوي دي.

زه سل په سلو کې باوري یم چې ښاغلی حبیب احمدزی د خپلو هغو ادعاوو د سپیناوي لپاره چې پر ارګ، ولسمشر غني، ځینو لوړ پوړو مسوولینو او مشاورینو یې لري هیڅ ډول سند هم نه لري او که یې سند هم لرلی، نو د هیواد ملي ګټو او ارزښتونو او د ملت عظمت او حیثیت ته په کتو یې باید دغه ډول بېباکانه څرګندونې نه وای کړې، نوموړي باید خپل اسناد او شواهد له عدلي او قضایي ارګانونو او یا هم په خپله له ولسمشر غني سره شریک کړي وای.

په دې کې شک نشته چې حاجي حبیب احمدزی په ډېرو مواردو کې ښکېل دی، هغه هم شراب خوري نشه کوي او هم بدلمنی دی ، ځکه د ده ډېر ملګري د ده په اړه مستندې کیسې لري، چې محبوب شاه محبوب یې هغه ورځ په اړه په ټولنیزو رسنیو کې اوږده لیکنه او په مسکو کې د حاجي حبیب په اړه د خپلو سترګو لیدلی حال لیکلی و، نو هیڅ امکان نه لري چې دغسې ککړ څوک دې را ولاړ شي او بیا دې د نورو په اړه دغسې ادعاوې ولري.

اوس چې حاجي حبیب دغه تهمتونه او تورونه پورې کړي، نو حکومت ته ښایي چې د ارګ د عظمت او د ملت د حیثیت په خاطر جدي څېړنې وکړي. عدلي او قضایي ارګانونه باید له هغه پوښتنې وکړي او مستند شواهد ورځنې وغواړي او که چېرې اسناد او شواهد نه لري، نو باید علني محکمه شي او داسې سزا ورکړل شي چې هم په خپله د ده او هم د نورو لپاره عبرت شي او بیا هیڅوک دېته زړه ښه نه کړي چې د خپلو شخصي عقدو په خاطر په ارګ، ولس او ولسمشر دغسې تورونه ولګوي چې زیان یې ټول وویني.

حتی په دې برخه کې خورشید تلویزیون هم ګرم بلل کېږي چې له نوموړي سره د مرکې پرمهال د دې پرځای چې له هغه څخه سند او شواهد وغواړي برعکس یې هغه نور هم ګړاوه او لا یې را سپاړه او غیر مسوولانه څرګندونو ته یې هڅاوه.

لنډه دا چې حاجي حبیب او د ده دغه ترسره شوی کار په هیڅ صورت او هیڅ شرط د زغم او بښنې وړ نه دی او که چېرې ورسره حساب ونشي او سزا ورنه کړل شي، نو باور دی چې دا کار به یې ډېرې بدې پایلې ولري.