طالبان یوازې د بین الافغاني مذاکراتو لاره لري

محمدبشیر یوسفزوی _

تر دا پرونه پورې وسله والو طالبانو په دې ځان ته مشروعیت ورکاوه چې دوی د امریکایانو پر ضد جنګېږي او ځکه ورسره جنګېږي چې د دوی هیواد یې اشغال کړی دی، مګر په حقیقت کې له همغې ورځې وسله وال طالبان له امریکایانو سره نه، بلکې له افغانانو سره په جنګ وو، ځکه چې د دوی په جنګونو، بریدونو او چاودنو کې تر ټولو زیات قربانیان عام افغانان دي، مګر عجیبه داده چې نن وسله وال طالبان د افغانانو پرځای له امریکایانو سره د سولې خبرې کوي.

دا به کوم سالم عقل ومني چې له خپل هیوادوال او ورور سره جنګ کوه، بې موجبه یې وژنه، شکنجه کوه یې، بدمرغه کوه یې او له امریکایي سره چې د دوی په اصطلاح د دین دښمن دی او افغانستان یې اشغال کړی دی له هغوی سره بیا په ابوظبۍ، دوحه او مسکو کې د سولې خبرې کوه او هغه هم د پردې تر شا، خو له دې څخه معلومېږي چې طالبان پرون هم په ناحقه او د بل په واک کې وو او نن هم ناحقه او پردي واک کې دي او هغوی چې څنګه ورته وایي، نو دوی همغسې کوي.

طالبان دې په خپلو کړنو له سره فکر وکړي او افغان ولس ته دې د دې ځواب ووایي چې ولې وژني افغانان او سوله له امریکایانو سره کوي؟ که دا د پاکستان لمسون وي او دا هر څه یې پر دوی تحمیل کړي وي ، نو ولس ته دې په ښکاره ووایي، ځکه افغانانو تل د مظلوم ملګرتیا کړې او د ظالم مخه یې نیولې ده، نو ولس به په خپل عظمت نه یوازې چې دوی وبښي، بلکې د پاکستان له ظلم به یې خلاص کړي او خپلې غېږې به ورته پرانیزي، مګر که چېرې وسله وال طالبان پوهېږي او دا درک کوي چې د دوی جنګ د وطن او وطنوالو په خلاف جنګ دی، نو بیا دې له دغه ناحقه او نامشروع جنګ څخه لاس واخلي او پر خپل ولس دې رحم وکړي، ځکه دا ولس دومره دردېدلی او کړېدلی دی چې نور د ظلمونو او وحشتونو تاب او زغم نه لري.

طالبانو ته د پاکستان او نورو له لوري دا تمه ورکړل شوې وه چې له دوی سره به د سولې په نامه د تړلو دروازو تر شا جوړ جاړی وشي، اوسنی حکومت به له منځه لاړ شي او واک به دوی ته ور وسپارل شي او په همدې  خاطر دوی رېنګه وکړ ه او د سولې پرځای یې پر جنګ ټینګار وکړ او جنګ یې شدید هم کړ، مګر کله یې چې په مخامخ جنګ کې د امنیتي او دفاعي ځواکونو پر وړاندې ځان کمزوری ولیده، نو د خپلې ماتې د پټولو او غچ اخیستلو په موخه یې په ښځو او ماشومانو، دیني علماو، ملکي وکړو، عامه تاسیساتو، جوماتونو، ښوونځیو او نورو عامه او ملکي ځایونو بریدونه وکړل.

وسله وال طالبان باید دا درک کړي چې نه د جنګ له لارې واک ته رسېدلی شي او نه هم د سولې په پلمه د تړلو دروازو تر شا پرېکړې دوی خپلو شومو موخو ته رسوي، نو د دې پرځای چې له افغانانو سره جنګ او له امریکایانو سره سوله وکړي، نو یا دې دا معادله سرچپه کړي او یا دې بېخي له جنګه لاس واخلي او د بین الافغاني مذاکراتو له لارې دې سولې ته راستانه شي.