نیمګړې څېرې

انساني ټولنه له مختلفو څېرو او بېلابېلو فکرونو جوړه ده، معلومه خبره ده، چې هر انسان ځانګړی اند لري، چې د یاد اند په  شتون کې بیا د خپل ژوند تګلاره ټاکي. خو په نننۍ معاصره نړۍ کې ځیني انسانان تر نورو ډېر خواږه، ځیرک او مینناک وي او ځیني یې نفرت، وېره، شیطانت… خوښونکي او کونکي وي.

دلته د هغو انسانانو ځانګړتیاوې او عادتونو درسره شریکو کوم، چې د خلکو له پامه او نظره بدیږي:

۱- دوی تل ځان خوښونکي وي.

۲- په خپلو خبرو کې دروغ وایي.

۳- چالاکي او فریب یې د ژوند سره کرښه وي، داسې فکر کوي چې دوی مخاطیبن غلط کړل او زه بریالی شوم حال دا، چې مخاطب د کوم مجبوریت او اړتیا له مخې دوی ته سر د هو تر اشارې لاندې خوځوي.

۴- حسد او کینه کوي.

۵- هیڅ وړتیا نه لرې بلکې تش په واعدو او لویو خبرو یې خلکو ته دروغحن قناعت ورکړی وي.

۶- لباس یې ښه رنګین وي، خو فکر او ذهن یې تش د بوسو پنډ وي.

۷- کوښښ یې دا وي، چې هر څوک د ځان ملګری کړي.

۸- نیت،عمل او رفتاریې خراب وي او دټولو اصولو خلاف تګ کوي.

۹- په ادارو او د دندې پر مهال کوښښ کوي، چې ځان پیاوړی وښئ او د مدیر او مشرتابه تر څنګ استوګنه خوښوي.

۱۰- هیڅ راز نه ساتي، شته ملګري ډېر ژر له لاسه ورکوي.

۱۲- له کار او کردار څخه یې خبرې ډېر زیاتي وي.

۱۳- په اخلاقي او اداري فساد ککړ وي.

۱۴- ژوند یې تنګ او ړنګ وي.

۱۵- له کورني جنجاله برخمن وي.

۱۸- له ټولو همکارانو څخه نفرت لري خو یو یا دوه  یې د خپل شیطانت په موخه د ځان کلک ملګري کړي وي.

۱۹- او ….

پورته ځانګړتیاوو ته په کتو په هره ټولنه، دفتر، کاري ځاي او حتا په ځینو کورنیو کې ورته کسان موجود وي چې نور خلک یې له کړنو په تنګ او په عذاب وي خو د وخت او بخت د مجبوریت له امله د هغوی سره یو ځای د ژوند نیمګړې چاري پرمخ وړي.

حل لاره يې څه ده؟!

 له داسې اشخاصو ځان خلاصول هم کومه اسانه کار نه دی او هغه څوک،  چې له دوی سره مبارزه کوي نو باید اتل ونومول شي.

خو ځیني مشورې باید په نظر کې ونیسو؛ موږ وایو چې حق تل ګټونکی او بریالی وي. باید موږ د حق پلوي اوسو او تل حق ته لبیک ووایو.

هغه کړنې، چې دی یې کوي موږ باید له هغو څخه صرف نظر وکړو.

تل حقیقت ووایو، اصول، قواعد… او ټولو شته طرزالعملونه په پام کې ونیسو.