امریکا ته غبرګون؛ هند وايي، افغانستان سره دولت – دولت اړیکې پالي، طالبانو سره نه ګورو

هند د زلمي خلیلزاد هغه غوښتنه رد کړې چې ویلي يې وو دغه هېواد دې له طالبانو سره مستقیمو مذاکراتو ته کېني.

د هند پرېنټ نومې ورځپاڼې د هندي چارواکو په حواله لیکلي، نوې ډيلي به هغه وخت له طالبانو سره مستقیم مذاکرات وکړي چې دغه ډله افغانستان کې ولسواکه پروسې، نظام او منتخب حکومت په رسمیت وپېژني.

یادې هندۍ ورځپاڼې ته حکومتي سرچینو ویلي، خلیلزاد نوې ډيلي ته په سفر کې د بهرنیو چارو له وزیر، د ملي امنیت له سلاکار او یو شمېر نورو لوړ پوړو چارواکو سره کتلي دي.

د سرچینې په خبره، خلیلزاد له یادو هندي چارواکیو غوښتي چې له طالبانو سره مستقیم مذاکرات وکړي، هغه څه چې د هند له لوري په مشروط ډول رد شوي.

سرچینې ویلي، د هند دریځ دا دی، چې د افغانستان د سولې پروسه کې به هغه وخت ونډه واخلي، چې دغه بهیر د افغانانو په مالکیت او  مشرۍ مخ ته ولاړ شي، نه دا چې ډلې ټپلې يې مخ ته یوسي.

خلیلزاد تېره ورځ له دوحې هند ته ولاړ او له هند څخه مستقیم پاکستان ته تللی، چې د دغه هېواد د پوځ له مشر سره یې افغان سوله خبرې کړې دي.

هند په سیمه کې د افغان حکومت تر ټولو ستر ملاتړی دی او تل یې د افغانانو په مشرۍ د سولې له پروسې ملاتړ کړی دی.

ولسمشر غني واک ته له رسېدو وروسته تل پر دې ټينګار کړی چې د سیمې هېوادونو سره دولت په دولت اړیکې پالې او دغه هېواودنه هم باید دغه ارزښت ته درناوی ولري.