جمعيت اسلامي ګوند له عبدالله څخه لار بيله کړه

د ولسمشر غني او عبدالله عبدالله ترمنځ د سياسي هوکړې له لاسليکولو وروسته د جمعيت اسلامي ګوند له عبدالله عبدالله څخه خپله لار بيله کړه.

د جمعيت ګوند رييس صلاح الدين رباني وايي، چې د عبدالله او غني په هوکړه کې دا ګوند شريک نه دى او خپلې مبارزې ته به دوام ورکوي.

جمعيت اسلامي ګوند چې د عبدالله عبدالله تر شا ولاړ و، څه وخت مخکې يې رييس صلاح الدين رباني په خپلو خبرو کې دا يادونه هم کړې وه، چې که چېرته عبدالله عبدالله له ولسمشر غني سره د سولې مصالحې شورا مشري ومني، نو دوى به ورسره خپل پرېکون اعلان کړي.

صلاح الدين رباني او د هغه ګوند غوښتل چې صدارتي نظام دې په افغانستان کې رايج شي او د همدې لپاره عبدالله عبدالله، صلاح الدين رباني او د دوى نورې ډلې هم هڅې کولې، خو بريالي نه شو.

د يادولو ده چې د ولسمشريزو ټاکنو د پايلو تر اعلان وروسته عبدالله عبدالله د پايلو له منلو انکار وکړ او خپل ځان يې بريالى اعلان کړ، هغه همدا راز د ځان بللي ولسمشر په توګه لوړه هم کړې وه.

خو د څو مياشتو له پرلپسې مذاکراتو وروسته تېره ورځ ولسمشر غني او عبدالله عبدالله ترمنځ سياسي هوکړه لاسليک شوه، چې له مخې يې عبدالله عبدالله د سولې مصالحې شورا مشر وټاکل شو او همدا راز د هغه ټيم ته په کابينه کې ځاى ورکول کېږي.